Sot shënohet Dita Ndërkombëtare e Gjuhës Amtare, një ditë që i kushtohet ruajtjes dhe zhvillimit të gjuhëve si shtylla themelore e identitetit kombëtar. Për shqiptarët, kjo është një mundësi për të reflektuar mbi përgjegjësinë që kemi ndaj gjuhës shqipe – një nga gjuhët më të vjetra të Evropës dhe një pasuri e pazëvendësueshme kulturore.
Në një kohë kur përdorimi i fjalëve të huaja po zë vend gjithnjë e më shumë në komunikimin e përditshëm, studiuesit theksojnë se shqipja ka mjaft burime të brendshme për të shprehur çdo mendim, nocion apo zhvillim të ri shoqëror e shkencor. Forcimi i kulturës gjuhësore në arsim, media dhe në hapësirën publike mbetet një detyrë e përbashkët.
Një hap i rëndësishëm në këtë drejtim është edhe vënia në dispozicion e Fjalorit të Madh të Gjuhës Shqipe në formë elektronike, tashmë i aksesueshëm për të gjithë. Ky fjalor përfaqëson një bazë të plotë dhe të përditësuar për përdorimin e saktë të fjalëve, kuptimeve dhe trajtave të shqipes, dhe duhet të shërbejë si burim referimi për nxënës, mësues, gazetarë, studiues dhe për çdo qytetar që dëshiron ta përdorë gjuhën me kujdes dhe përgjegjësi.
Gjuha amtare nuk është vetëm mjet komunikimi, por themel i vetëdijes sonë kombëtare. Ta flasim dhe ta shkruajmë shqipen me korrektësi është mënyra më e thjeshtë dhe më e drejtpërdrejtë për ta ruajtur dhe nderuar atë.
