Një operacion i gjerë policor po zhvillohet në Durrës, Tiranë dhe Elbasan për çështjen e 102 kontejnerëve me rreth 210 ton mbetje të dyshuara të rrezikshme, të lidhura me aktivitetin e kompanisë “Kurum” dhe të kthyera në Shqipëri pasi u bllokuan jashtë vendit.
Sipas burimeve nga hetimi, Prokuroria e Durrësit ka lëshuar 33 urdhër-arreste, ku 26 janë “arrest në burg”, 6 “arrest shtëpie”, dhe një tjetër masë e raportuar për “detyrim paraqitjeje”. Ekzekutimi i vendimeve është në vijim dhe përfshin disa struktura policore në qytetet ku po kryhen kontrollet.
Si nisi historia e 210 tonëve
Çështja shpërtheu publikisht pas alarmit të organizatës mjedisore “Basel Action Network”, e cila në verën e vitit 2024 sinjalizoi se një ngarkesë e nisur nga Porti i Durrësit drejt Tajlandës mund të përmbante mbetje të rrezikshme, të lidhura me hirin e oxhaqeve të furrave elektrike metalurgjike– një nënprodukt që konsiderohet me risk të lartë nëse menaxhohet jashtë standardeve.
Kontejnerët u bllokuan fillimisht në Singapor dhe më pas u rikthyen në Shqipëri. Në atë periudhë, edhe Ministria përgjegjëse pranoi publikisht se bëhej fjalë për volume të dyshuara si mbetje të dala nga procesi metalurgjik, ndërsa kompania “Kurum” ka deklaruar se nuk ka lidhje me eksportin e mbetjeve të rrezikshme.
Kush janë të arrestuarit: lista e emrave dhe rolet
Operacioni ka në fokus një zinxhir të gjerë përgjegjësish – nga kompania burim, te eksportuesi, te dogana, porti dhe strukturat e mjedisit. Në listën e masave të sigurisë të bёra publike deri mё tani përfshihen:
Arrest në burg
- Erdal Demir – Administratori i “Kurum International”
- Yusuf Sezai Kurum – Administrator me prokurë i “Kurum”
- Gjovana Sokolaj – Pronare e kompanisë “Sokolaj”
- Doni Sokolaj – Administrator i kompanisë D.o.o Minerals
- Olizana Pemati – Ish-administratore e kompanisë “Sokolaj”
- Mujo Ilazaj – Drejtori i Transportit në “Kurum”
- Rami Bunga – Specialist pranë zyrës së mjedisit në “Kurum”
- Harun Sarica – Drejtori i prodhimit të çelikut në “Kurum”
- Arif Shkalla – Drejtues në “Kurum”
- Shaban Hyseni – Drejtor i departamentit të shitjeve në “Kurum”
- Mikail Hila – Aksioner i agjencisë doganore “Joti Spedition”
- Mbarime Koroci – Aksionere e kompanisë “Alliance Resource”
- Nazif Bajrami – Pronar i kompanisë “Bajrami N”
- Andon Prifti – Administrator i kompanisë “Bajrami N”
- Petrit Qosja – Person fizik në tregtinë e mbetjeve
- Julian Kapedani – Dega e Doganës Durrës
- Indrit Likaj – Dega e Doganës Durrës
- Helidon Lila – Dega e Doganës Durrës
- Edmond Voda – Dega e Doganës Durrës
- Shkëlqim Jakupi – Dega e Doganës Durrës
- Florian Çimo – Administrator i kompanisë koncesionare EMS APO
- Gazmend Sina – Punonjës i kompanisë koncesionare EMS APO
- Ingo Hesse – Administrator i EMS APO
- Dritan Seferaj – Drejtoria e Inspektim-Kontrollit, AKM
- Kejdi Ahmetaj – Drejtoria e Inspektimit, AKM
- Xhulio Golgota – Inspektor i Autoritetit Portual Durrës
Arrest shtëpie
- Mirjeta Zotaj – Kontabiliste e kompanisë “Sokolaj”
- Arta Dollani – Ish-drejtoresha e Përgjithshme e AKM
- Marjeta Përlala – Drejtoresha aktuale e AKM
- Kledina Skendo – Sektori i monitorimit të lejeve mjedisore, AKM
- Bujana Tonçiça – Sektori i lejeve mjedisore, AKM
- Evis Mellonashi – Sektori i lejeve mjedisore, AKM
- Iva Musa – Inspektore e Autoritetit Portual Durrës
Hetimet pritet të sqarojnë se ku është “prerë” zinxhiri i kontrollit: si u certifikua ngarkesa, si u lejua dalja, kush firmosi lejet, kush kontrolloi në doganë dhe në port, dhe ku përfundoi përgjegjësia institucionale përpara se kontejnerët të ndaleshin jashtë vendit.
Operacioni vijon dhe nuk përjashtohen zhvillime të tjera, ndërsa autoritetet ende nuk kanë bërë një komunikim shterues publik për të gjitha elementët e dosjes dhe akuzave.
