Fundi i vitit është një moment natyror për reflektim: çfarë na ka formuar, çfarë na ka lodhur dhe çfarë duam të marrim me vete në vitin e ri. Sipas autores amerikane Jancee Dunn, një pyetje e vetme mund të hapë rrugën për një reflektim më të thellë: Çfarë ia vlen vërtet të mbahet mend nga viti që po mbyllet?
Këshilla vjen nga psikologia dhe autore Kandi Wiens, e cila sugjeron të mos fokusohemi te arritjet formale apo listat e objektivave, por te momentet e vogla që i dhanë kuptim vitit: një bisedë që ndryshoi diçka, një çast i qetë që befasoi, apo një vështirësi që në fund doli me vlerë.
Duke u mbështetur në mendimet e ekspertëve të shëndetit mendor, ja shtatë pyetje që mund të shërbejnë si udhërrëfyes për një Vit të Ri më të vetëdijshëm dhe më të balancuar.
Kur u ndjeve më i lumtur dhe i çliruar?
Sipas filozofes Valerie Tiberius, të kujtosh momentet e vërteta të gëzimit ndihmon të kuptosh se ku ia vlen të investosh kohën dhe energjinë. A ishte me njerëz të caktuar, në natyrë, apo gjatë një aktiviteti që të mbush shpirtërisht?
Çfarë të dha energji dhe çfarë ta mori?
Psikologia klinike Deepika Chopra thekson se nuk ka rëndësi vetëm çfarë ndodhi, por edhe si reagove ndaj asaj që ndodhi. Të dallosh aktivitetet dhe marrëdhëniet që të ushqejnë emocionalisht nga ato që të lodhin është thelbësore për planifikimin e vitit të ardhshëm.
Çfarë dukej e pamundur, por ia dole?
Të rikthesh vëmendjen te sfidat që ke kapërcyer ndërton vetëbesim dhe forcë të brendshme. Kujtimi i momenteve kur u përshtate, mësove dhe u ringrite është provë reale e qëndrueshmërisë personale.
Cilin zakon do të doje ta bëje më të qëndrueshëm?
Sipas psikologut Anil Chacko, shpesh fokusohemi te zakone të reja, duke harruar se tashmë po bëjmë gjëra të mira, por në mënyrë të paqëndrueshme. Edhe një ndryshim i vogël, i përsëritur rregullisht, mund të ketë ndikim të madh.
Çfarë u përpoqe të kontrolloje, por ishte jashtë kontrollit tënd?
Një nga mënyrat më të shpejta për të ulur ngarkesën mendore është të lësh mënjanë gjërat që nuk varen prej nesh, si reagimet apo vendimet e të tjerëve. Pranimi i kësaj sjell më shumë qetësi dhe qartësi.
A ke dikë që duhet ta falësh në Vitin e Ri?
Sipas psikologut Anthony Chambers, falja nuk do të thotë të harrosh, por të zgjedhësh të mos lejosh që e shkuara të kontrollojë emocionet e së tashmes. Kjo zgjedhje mund të jetë çliruese dhe shëruese.
Me kë do të doje të ishe më i pranishëm?
Ndonjëherë, pyetjet më të thjeshta janë edhe më domethënëset: sa shpesh i ke telefonuar njerëzit që kanë rëndësi për ty dhe si mund ta bësh këtë më shpesh vitin që vjen?
Reflektimi i fundvitit nuk ka për qëllim të gjykojë apo të rëndojë, por të ndihmojë për të hyrë në Vitin e Ri me më shumë vetëdije, butësi ndaj vetes dhe qartësi për atë që vërtet ka rëndësi.
(Burimi: The New York Times)
