“Çdo gjë që nuk na vret vetëm na forcon” – kjo ishte mbyllja e një monologu të gjatë, që Edi Rama e recitoi sot që në agim.
Penduli narrativ i tij për më se një orë u lëkund me emocion të përmbajtur, duke dhënë mesazhe force por dhe nevojë për dialog, rrugëzgjidhje.
“Të paktën hajde më bind, pse duhet të iki” – tha ai. “Të ulemi të flasim ku të doni!” – iu drejtua studentëve, apo forcës “së errët” që është pas tyre. Por këtë, sipas tij duhet ta bënin me njerëzillëk, jo me gurë apo saçme që çajnë nofulla policësh.
Në të gjithë narrativën e tij, Rama, përshkoi përsëritur ato çfarë gjithnjë i ka thënë sa herë del publikisht. Akuzoi PD-në, iranianët dhe dashakeqët e Shqipërisë, që fshiheshin pas komplotit; për studentët kujtoi dialogun e para disa viteve dhe Paktin për universitetin. U përpoq të justifikohej se “i kishte dëgjuar edhe Flamingot”, kur foli për një “Ligj për strehimin social dhe të përballueshëm” që do parashikonte kredi me zero interes apo qera që do paguhej gjysma nga shteti.
Por i “rrëshqiti” pak situata kur akuzoi se shumë prej tyre, studentë, ishin të pronarit të News24, pra Irfan Hysenbelliut. Edi Rama nënkuptoi studentët e Universitetit privat “Luarasi” me pronar Hysenbelliun dhe rektor Maksim Haxhinë, avokatin e Ergys Agasit, njëkohësisht “bashkëpunëtorin” e qeverisë anti SPAK dhe hartës gjyqësore.
Edi Ramës, me siguri nuk i kanë raportuar të tijët se, “Luarasi” është kthyer në strehën komode të të ikurve nga qeveria e tij dhe se studentët në pjesën dërrmuese vijnë nga familjet e administratës së lartë që kanë para të paguajnë mijëra euro shkollim privat.
Monologu i këtij mëngjesi nuk harroi as Prokurorinë e Tiranës që nuk “burgos” Irfan Hysenbelliun, i cili bën evazion fiskal.
Rama ka mbi dy tre vite që godet prokurorët e Tiranës, kur është i detyruar të “lëvdojë” ata të SPAK.
Dmth. SPAK bën, Prokuroria e thjeshtë s’bën. Këtë ide idiote i kanë ngulur në narrativën juridike, këshilltarët e tij, Edi Ramës.
A ka këshilltarë Kryeministri që t’i thonë se është e njëjta KLP që ka zgjedhur si Ols Dadon me Altin Dumanin ashtu dhe Arenc Çelën me Ndini Tavanin?
Është e njëjta KLP që i monitoron, dhe i vlerëson njëlloj “shkëlqyeshëm” për punën e tyre të gjithë.
Kryeministri Rama hodhi edhe një “bombë” për të gjithë përkrahësit dhe komentatorët e idesë së “shkatërrimit”. Ai nuk e kuptoi se padashje bombën ua plasi të gjithë analistëve, patronazhistëve dhe “Ram-istëve” të tij, kur tha “Nuk është e vërtetë që ka shkatërrim…vetëm 50 biznese janë dëmtuar dhe fasadat dhe sportelet e disa bankave dhe kompanive telefonike“.
Edi Rama i zhveshi lakuriq me këtë pohim “Muçnanot” e teorisë së shkatërrimit. Ata që ai i quajti Shqipëria dhe Hipokrizia e njerëzve të kamur. Ata që bëjnë para online. Ata që fitojnë favore…dhe “s’dinë të jetojnë pa favore”.
Natyrisht që Edi Rama nuk mund t’i shpëtonte delirimit në pendulin e fantazisë kur si nëpër dhëmbë pranoi korrupsionin e qeverisë dhe e mbrojti me teorinë “Korrupsioni është problem kulturor ndër shekuj“.
Të krahasosh problemin aktual të korrupsionit në Shqipëri me aftësinë natyrale të njeriut për të rënë pre e tij, është sikur shqiptarit të mos i vendosësh “Besën” në traditën e tij shekullore, por t’i damkosësh “Vjedhjen”.
Negociatat, Europa, kapitujt e hapur por të pambyllur, nevoja e përditshme për të komunikuar lidhur me to, u futën nga Rama, si alibia e pamohueshme e “mosdorëheqjes”. Për të vetmen arsye madhore dhe patriotike duhet që ai të vazhdojë këtë qeverisje, për të mos e ndërprerë atë: Për hir të Shqipërisë dhe rrugës së saj në Evropë!
Edi Rama po luan kartën e fundit për shqiptarët “Pa mua nuk shkoni dot në Evropë” që në të vërtetë është “As” dinak për Evropën që po i thotë “Pa mua bëhet kiameti!” Ndaj dhe mos flisni kur “Renea doli dhe do dalë!”.
Ky është artikull ekskluziv i KontrasT.al, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to” / Artikulli mund të ripublikohet vetёm i shoqëruar me linkun e artikullit origjinal.
