Ashley St. Clair, nëna e njërit prej fëmijëve të Elon Musk, ka ngritur padi kundër kompanisë së tij të inteligjencës artificiale xAI, duke e akuzuar se chatbot-i i saj Grok ka gjeneruar dhe shpërndarë imazhe të rreme intime të saj pa pëlqimin e saj. Padia u depozitua të mërkurën në Nju Jork dhe pretendon se teknologjia e kompanisë është përdorur për të krijuar përmbajtje fyese dhe degraduese ndaj saj me kërkesë të përdoruesve të platformës X.
Në dokumentet gjyqësore thuhet se Grok ka prodhuar “përmbajtje të shumtë abuzive dhe intime” që lidhej me St. Clair, edhe pasi ajo kishte deklaruar publikisht se nuk jepte pëlqimin për përdorimin e imazhit të saj në këtë mënyrë. Padia pretendon gjithashtu se në një rast përdorues të platformës kanë gjetur fotografi të saj nga adoleshenca dhe i kanë kërkuar chatbot-it t’i modifikojë ato në mënyrë të papërshtatshme, duke shtuar se sistemi ka reaguar ndaj këtyre kërkesave.
Ky veprim ligjor vjen në të njëjtën ditë kur xAI njoftoi se Grok nuk do të lejojë më modifikimin e imazheve të personave realë me përmbajtje të papërshtatshme, pas kritikave të forta publike që chatbot-i kishte pranuar kërkesa për të gjeneruar imazhe të rreme intime të të rriturve dhe, në disa raste, edhe të të miturve.
Kompania xAI nuk ka dhënë ende një koment zyrtar mbi padinë. Ndërkohë, Elon Musk shkroi në platformën X se nuk ishte në dijeni të ndonjë rasti ku Grok të ketë gjeneruar imazhe të papërshtatshme të të miturve dhe shtoi se chatbot-i është projektuar të refuzojë çdo përmbajtje që shkel ligjin, duke vepruar sipas rregullave të çdo vendi ku përdoret.
Në padinë e saj, St. Clair kërkon gjyq me juri dhe kompensim financiar, duke pretenduar se ka pësuar shqetësim emocional dhe shkelje të privatësisë.
Marrëdhënia mes St. Clair dhe Musk ka qenë më herët në qendër të vëmendjes publike. Vetëm disa ditë më parë, Musk deklaroi në X se planifikon të kërkojë kujdestarinë e plotë të fëmijës së tyre. St. Clair u shfaq gjithashtu në një emision të CNN ku foli për rrezikun e përhapjes së imazheve të rreme të gjeneruara nga inteligjenca artificiale, duke thënë se aktualisht mungojnë masat reale për të parandaluar një fenomen të tillë dhe se ndërhyrjet e kompanive teknologjike po ndodhin vetëm pasi dëmi tashmë është bërë.
Rasti ka hapur njё debat të fortё mbi përgjegjësinë ligjore të kompanive të inteligjencës artificiale dhe kufijtë e përdorimit të teknologjisë në krijimin e përmbajtjeve të rreme digjitale.
