Kuba po përballet me një nga momentet më të vështira të viteve të fundit, ndërsa administrata e Presidentit Donald Trump ka ndërprerë rrjedhën e naftës drejt ishullit, në një përpjekje për të detyruar qeverinë komuniste të ndërmarrë reforma të thella politike dhe ekonomike. Me rezervat që po shterojnë dhe pa një aleat të gatshëm të furnizojë karburant me vlerë qindra milionë dollarë, ekonomia kubaneze po ngadalësohet drejt një paralize të plotë.
“Nuk ka benzinë, nuk ka para, nuk ka asgjë”, deklaroi Trump para gazetarëve, duke theksuar se Sekretari i Shtetit Marco Rubio po udhëheq përpjekjet për negociata me zyrtarët kubanë. Rubio, i njohur për qëndrimin e tij të ashpër ndaj regjimit në Havana, ka thënë se e vetmja çështje për diskutim me udhëheqjen kubane është se kur ajo do të largohet nga pushteti.
Në terren, pasojat janë të dukshme. Mësimi është pezulluar në shumë shkolla për të kursyer energji, punëtorë janë dërguar në shtëpi, hotele janë mbyllur dhe fluturime nga Rusia dhe Kanadaja janë anuluar për shkak të mungesës së karburantit për avionë. Mbretëria e Bashkuar dhe Kanadaja kanë paralajmëruar qytetarët e tyre të shmangin udhëtimet jo thelbësore drejt Kubës.
Në Havana, ndërprerjet e energjisë janë bërë rutinë. Netëve, pjesa më e madhe e qytetit zhytet në errësirë, ndërsa në rrugë njerëzit diskutojnë se kur do të vijë ndërprerja e radhës dhe sa do të zgjasë. Mungesa e karburantit ka paralizuar transportin e mallrave, duke bërë që ushqimet të mos arrijnë nga zonat rurale drejt kryeqytetit.
Organizatorët anuluan Festivalin vjetor të Puros Habanos, një event që sjell miliona dollarë të ardhura. Kompania Sherritt International ka pezulluar operacionet e saj të nxjerrjes së nikelit dhe kobaltit për shkak të mungesës së karburantit. Disa spitale shtetërore kanë reduktuar shërbimet, ndërsa mbeturinat po grumbullohen në lagje të tëra pasi kamionët nuk funksionojnë.
Kriza rrezikon të përshkallëzohet në një emergjencë humanitare. Pjesa më e madhe e ushqimit në Kubë importohet, pas dekadash politikash bujqësore të dështuara. Tani edhe kjo linjë furnizimi është në rrezik, pasi disa kompani private që importojnë ushqime nga SHBA kanë pezulluar aktivitetin, duke thënë se nuk mund t’i ruajnë produktet gjatë ndërprerjeve të përditshme të energjisë.
Në “tregjet bujqësore” të Havanës, çmimet janë rritur ndjeshëm. “Po paguajmë dy, tre herë më shumë për të rimbushur furnizimet”, tha një shitëse ushqimesh që kërkoi të mbetej anonime. “Nuk ka ushqim. Ndikimi do të jetë i tmerrshëm.”
Presidenti kuban Miguel Díaz-Canel i ka bërë thirrje qytetarëve të “rezistojnë në mënyrë krijuese” dhe të përqafojnë një mentalitet të kohës së luftës. “Do të hamë çfarë të prodhojmë në secilin vend”, tha ai, duke paralajmëruar se mungesa e karburantit do ta bëjë të pamundur transportin e ushqimeve mes komunave.
Ndërkohë, në SHBA, politikanë kubano-amerikanë kërkojnë masa edhe më të ashpra. Kongresmenja republikane Maria Elvira Salazar ka bërë thirrje për ndërprerje të plotë të turizmit, remitancave dhe çdo mekanizmi që, sipas saj, “financon dhe mbështet diktaturën”.
Në rrugët e Havanës, shumë qytetarë po mendojnë për emigrimin. Mandy Pruna, shofer makinash klasike që prej 20 vitesh transportonte turistë me Chevrolet-in e tij, thotë se nuk sheh më të ardhme në vendin e tij. “Nuk ka karburant. Nuk e dimë nëse do të ketë. Nëse duhet ta paguaj me dollarë dhe nuk ka turizëm, si do të mbijetojmë?” shprehet ai.
Pas dekadash mbijetese në prag të kolapsit, Kuba duket sërish në buzë të një krize të thellë ekonomike dhe sociale, ndërsa presioni amerikan shtohet dhe alternativa për dalje nga ngërçi mbetet e paqartë.
(Burimi: CNN)
