Kuvendi i Shqipërisë mblidhet sot në orën 17:00 në seancë plenare, në një mbledhje që pritet të ketë në qendër diskutimet për problematikat e ngritura nga qytetarët në zona të ndryshme të vendit.
Sipas rendit tё ditёs, deputetët do të marrin fjalën për të adresuar çështje që, sipas tyre, kërkojnë vëmendjen e qeverisë dhe institucioneve. Kjo pjesë e seancës zakonisht shndërrohet në një hapësirë ku përzihen shqetësimet reale të komuniteteve me mesazhe politike, kritika ndaj kundërshtarëve apo qëndrime për aktualitetin.
Sot pritet të flasin jo vetëm përfaqësues të shumicës dhe opozitës, por edhe deputetë të pavarur, zëra që rrallëherë dëgjohen gjatë debatit parlamentar. Ata do të kenë në dispozicion nga pak minuta, me siguri sa për të lexuar fjalimet e përgatitura, duke sjellë në sallë çështje që mё shumё se lidhen me hallet e qytetarëve, synojnë të ezaurojnё minutazhin pёr qёllime politike.
Në rendin e ditës të publikuar në faqen zyrtare të Kuvendit, të paktën deri në këtë moment, nuk janë përfshirë dekretet e Presidentit të Republikës për shkarkimin dhe emërimin e ministrave të rinj. Nëse do të kishte votim për këto dekrete, ato do të duhej të ishin të listuara qartë në rend dite.
Seanca e pasdites pritet të tregojë nëse do të kemi vetëm diskutime politike dhe çështje të ngritura nga deputetët, apo nëse do të ketë zhvillime të tjera në axhendën parlamentare.
