Asgjë nuk ndodhi, nga ato që Bill Klinton paralajmëroi dje me thirrjen/fjalimin drejtuar popullit amerikan. Tre skenarët e tij u “shembën” nga një mesazh tjetër i orëve të fundit nga presidenti Donald Trump.
Përmes një njoftimi të dytë, në orët e fundit, Trump deklaron se SHBA-të me Iranin kanë zhvilluar “biseda produktive” dhe për këtë shkak do të pezullojë çdo sulm ushtarak kundër centraleve energjetike iraniane për pesë ditë.
Me këtë deklaratë presidenti amerikan tërheq “deadline”-in e tij që përfundonte sot në 11:44, bashkë me kërcënimin se do të asgjësonte burimet energjetike të Iranit, nëse Teherani nuk lejonte rihapjen e plotë të Ngushticës së Hormuzit.
Duket si lajm që vjen nga protestat e opozitës në Shqipëri, ku lideri i opozitës e shtyn “betejën” gjithnjë për herën tjetër. Gjithsesi ky është lajm i mirë për ekonominë botërore që priste me “vesh” ngritur se ç’do ndodhte në mesnatë. Ngushtica e Hormuzit është një rrugë ujore thelbësore për ekonominë globale, aq sa edhe një president amerikan e detyron të bëjë mbrapsht me zotimet e tij.
Vendimi i fundit i Donald Trump ka pasur efekt të menjëhershëm në tregjet ndërkombëtare. Menjëherë pas deklaratës për shtyrjen e sulmeve dhe sinjaleve për ulje tensioni, çmimet e naftës kanë pësuar rënie të ndjeshme.
Nafta Brent e Detit të Veriut ka rënë me më shumë se 7%, duke zbritur në rreth 104.37 dollarë për fuçi. Ndërkohë, nafta amerikane West Texas Intermediate ka shënuar një rënie edhe më të fortë, mbi 14%, duke shkuar në rreth 84.37 dollarë për fuçi.
Ky reagim i menjëhershëm i tregjeve konfirmon se tensionet në Ngushticën e Hormuzit mbeten një nga faktorët më të ndjeshëm për ekonominë globale. Çdo sinjal për përshkallëzim apo qetësim përkthehet direkt në çmime.
Mesazhi i Trump, ku ai pranoi se SHBA dhe Irani kanë zhvilluar “biseda produktive”, u interpretua nga tregjet si një hap pas nga përplasja e drejtpërdrejtë ushtarake dhe një mundësi për zbutjen e situatës.
Por përtej retorikës politike, realiteti është më i thjeshtë: ekonomia globale dhe tregjet financiare shpesh detyrojnë edhe liderët më të fortë të rishikojnë vendimet e tyre.
Dhe këtë herë, ka gjasa qё presioni i tregjeve bëri atë që nuk e bënë dot as kërcënimet ushtarake…
