Për shumë shqiptarë, shprehja “Ju flet Tirana” nuk është vetëm një fjalë, por një kujtim i gjallë i historisë së radiofonisë shqiptare. Radio Tirana, e cila nisi transmetimet e para më 28 nëntor 1938, është e para radio në vend që hodhi themelet e medias shqiptare dhe që vazhdon të jetë zëri i kryeqytetit e i Shqipërisë përtej dekadash.
Historikisht, transmetimet e para nisën nga një ambient i Bashkisë së dikurshme dhe më pas u zhvendosën në rrugën “Kont Urani”. Hapja e radios u prit me entuziazëm të madh, ndërsa ceremoninë e inaugurimit e nderuan me praninë e tyre Mbreti Zog dhe Mbretëresha Geraldinë. Programacioni fillestar përfshinte muzikë patriotike dhe popullore, përmes disqeve të gramafonave të dhuruar nga vetë qytetarët.
Gjatë pushtimit italian dhe më pas gjerman, Radio Tirana u bë një mjet i rëndësishëm për përhapjen e thirrjeve patriotike dhe shpëtimin e informacionit. Në 17 nëntor 1943, personeli i radios u përball me një përpjekje të Gestapos për ta kontrolluar, por vetëm një vit më vonë, më 17 nëntor 1944, radioja u rikthye nën kontrollin shqiptar, duke rifilluar transmetimet e saj.
Pas luftës, Radio Tirana u bë qendër kulturore e artistike. Në studio këndonin këngëtarë të njohur si Tefta Tashko Koço, Kristaq Antoniu dhe Marie Kraja. Më pas filluan emisionet me këngë patriotike, reportazhe nga hekurudhat, nga jeta në qytet, filluan emisionet “Ora e gruas”, “Ora e fëmijëve”, “Ora e katundarit”, “Ora gazmore”, “Këshilla mjekësore”, etj., ndërsa lajmet në gjuhë të huaj nisën që nga prilli i vitit 1939.
Në vitet ’60, u krijua Orkestra e Radios dhe Kinematografisë, ndërsa në 1962 u zhvillua Festivali i parë i muzikës së lehtë shqiptare. Me gjithë kufizimet ideologjike të kohës, Radio Tirana vazhdoi të mbetet një institucion i rëndësishëm i kulturës shqiptare.
Vitet ’90’ sollën ndryshime të mëdha: më shumë liri për gazetarët dhe informim më të drejtpërdrejtë për qytetarët, duke bërë që Radio Tirana të mbetet jo vetëm dëshmitare e ngjarjeve historike, por edhe protagoniste e tyre. Sot, pas më shumë se 85 vjetësh, zëri i saj vazhdon të frymëzojë, duke ruajtur një traditë që lidhet me kulturën, muzikën dhe emancipimin e shoqërisë shqiptare.
