Ecja me biҫikletё është një nga aktivitetet fizike më të përhapura dhe më të rekomanduara për shëndetin e zemrës dhe formën trupore. Megjithatë, prej vitesh shumë burra jetojnë me një frikë të vazhdueshme: a mund ta dëmtojë biçikleta prostatën ose jetën seksuale? Një urolog amerikan, Dr. Jamin Brahmbhatt, i cili vetë e ka përjetuar këtë shqetësim, jep një përgjigje të qartë dhe të mbështetur në fakte shkencore.
Gjatë pandemisë, Dr. Brahmbhatt bleu një biçikletë statike dhe nisi të ushtrohej rregullisht. Pas disa javësh, ai vuri re një ndjesi presioni të lehtë dhe të herëpashershme në zonën e legenit, afër prostatës. Si mjek urolog, kjo ndjesi i shkaktoi ankth dhe frikë se mund të ishte shenja e një problemi serioz ose se mund të ndikonte në funksionin seksual. Kaq mjaftoi që ai të ndalonte stërvitjen dhe madje ta shiste biçikletën. Me kalimin e kohës, ai kuptoi se problemi nuk ishte vetë çiklizmi, por mënyra e gabuar e qëndrimit dhe reagimi i tepruar ndaj ndjesive normale trupore.
Prostata ndodhet thellë në legen, mbi zonën e quajtur perineum – pjesa e butë midis organeve gjenitale dhe anusit. Gjatë çiklizmit, veçanërisht në ulёse të ngushta ose gjatë qëndrimit të gjatë ulur, pesha e trupit përqendrohet pikërisht në këtë zonë. Aty kalojnë nerva dhe enë gjaku shumë të rëndësishme për ereksionin dhe funksionin urinar. Presioni i vazhdueshëm mund të shkaktojë ndjesi mpirjeje, djegieje apo siklet, të cilat shumë burra i interpretojnë gabimisht si “dhimbje prostate”. Në realitet, sipas Shoqatës Amerikane të Urologjisë, këto ndjesi lidhen më shumë me irritimin e muskujve të dyshemesë pelvike dhe indeve përreth, jo me dëmtim të vetë prostatës.
Një tjetër burim konfuzioni është diagnoza e prostatёs. Në shumicën e rasteve, burrat nuk kanë infeksion bakterial, por simptoma që vijnë nga muskuj të tensionuar, nerva të ndjeshëm, stres apo qëndrimi i gjatë ulur. Çiklizmi, sidomos për fillestarët ose ata që nuk ndryshojnë pozicion gjatë stërvitjes, mund t’i përkeqësojë këto ndjesi dhe të krijojë përshtypjen e një problemi serioz, edhe pse prostata është plotësisht normale.
Frika nga disfunksioni erektil është ndoshta shqetësimi më i madh. Studime të vjetra kishin sugjeruar se çiklizmi mund të ndikonte negativisht në qarkullimin e gjakut drejt penisit, por kërkimet më të fundit tregojnë se çiklizmi i rregullt nuk rrit rrezikun afatgjatë të problemeve me ereksionin. Përkundrazi, për shkak se përmirëson shëndetin e zemrës dhe të enëve të gjakut, ai shpesh shoqërohet me funksion më të mirë seksual. Mpirja ose ndjesitë e çuditshme pas një udhëtimi të gjatë janë zakonisht të përkohshme dhe zhduken sapo largohet presioni.
Biçikletat statike priren të krijojnë më shumë shqetësime sepse mbajnë trupin në një pozicion fiks për një kohë të gjatë, sidomos gjatë rezistencës së lartë. Ndryshe nga çiklizmi në natyrë, ku trupi lëviz, ngrihet dhe ndryshon pozicion shpesh, biçikleta statike rrit presionin konstant mbi legenin. Megjithatë, edhe këtu problemi zgjidhet zakonisht me rregullime të vogla të shalёs sё biҫikletёs, qëndrimit dhe kohëzgjatjes së stërvitjes.
Sipas urologëve, shumica e shqetësimeve zhduken me përshtatje të thjeshta dhe pa pasur nevojë të hiqet dorë nga aktiviteti. Vetëm në rastet kur dhimbja, mpirja apo ndryshimet urinare zgjasin për orë ose ditë, është e këshillueshme një kontroll mjekësor. Këto simptoma janë zakonisht të trajtueshme dhe nuk nënkuptojnë dëmtime të përhershme.
Çiklizmi nuk e dëmton prostatën dhe nuk shkatërron jetën seksuale. Ndjesitë e pakëndshme janë reale, por shpesh keqinterpretohen. Me pozicion korrekt, pajisje të përshtatshme dhe pa panik të panevojshëm, biçikleta mund të mbetet një aleat i fortë i shëndetit mashkullor.
(Burimi: CNN Health)
