Ideja e punës nga ora 8:00 deri në 16:00, për shumë vite, ka qenë një rregull i pashkruar në gjithë botën. Por sot, kjo mënyrë po vihet gjithnjë e më shumë në pikëpyetje. Një qasje e re, që po përhapet sidomos pas pandemisë, po ndryshon ritmin e ditës së punës: njerëzit nuk punojnë më në një bllok të vetëm, por në pjesë të shkurtra gjatë ditës, duke e ndërthurur punën me jetën personale.
Kjo është mënyra si funksionon dita e shumë profesionistëve sot. Ata nisin punën herët në mëngjes, ndalojnë për disa orë për t’u marrë me familjen apo punët e përditshme, dhe rikthehen sërish më vonë me më shumë përqendrim. Në vend që të rrinë përpara ekranit pa ndërprerje, ata e ndajnë ditën në intervale më të shkurtra, duke punuar kur ndihen më produktivë.
Në thelb, ky ndryshim po sjell një ide të re: rëndësi nuk ka më sa orë qëndron në punë, por çfarë arrin të bësh. Disa drejtues dhe ekspertë besojnë se kjo mënyrë e rrit produktivitetin, sepse truri ka nevojë për pushime për të menduar më qartë. Shpesh, idetë më të mira nuk vijnë kur je i ngulur para kompjuterit, por kur largohesh pak prej tij.
Ky model ka sjellë një lehtësim të madh për shumë njerëz, sidomos për prindërit apo për ata që kanë përgjegjësi të tjera gjatë ditës. Mundësia për të organizuar vetë kohën u jep atyre më shumë kontroll mbi jetën dhe më pak stres.
Megjithatë, kjo mënyrë pune nuk është pa probleme. Kur secili ndjek ritmin e vet, bëhet më e vështirë të punohet në grup dhe të koordinohen detyrat.
Ndërsa nё disa raste, njerëzit ndihen sikur nuk e mbyllin kurrë ditën e punës, sepse ajo shpërndahet gjatë gjithë ditës dhe mbrëmjes.
Edhe në Shqipëri, ndonëse orari klasik mbetet ende dominues, sidomos në sektorin publik, shenjat e këtij ndryshimi kanë filluar të duken. Në disa kompani private dhe në punë që lidhen me teknologjinë apo krijimtarinë, fleksibiliteti po bëhet gjithnjë e më i pranishëm.
Në fund, dilema është e thjeshtë, por e madhe: a duhet të vlerësohet një punonjës për kohën që kalon në punë, apo për rezultatin që jep?
Në një botë që ndryshon me shpejtësi, edhe përgjigjia ndaj kësaj pyetjeje duket se po ndryshon bashkë me të.
