Shumë njerëz besojnë se periudhat e vështira të jetës mund të lënë gjurmë edhe tek flokët, duke i bërë ato të zbardhen më shpejt. Mjafton të shohësh liderë botërorë që dalin nga mandatet me më shumë thinja sesa kur hynë. Por çfarë thotë realisht shkenca?
Ekspertët theksojnë se ende nuk ka një provë përfundimtare që stresi i bën flokët gri, megjithëse disa studime sugjerojnë se mund të ketë një lidhje.
Studimet e hershme janë bazuar kryesisht në pyetësorë, ku pjesëmarrësit raportonin nivelin e stresit dhe ndryshimet në flokë. Një kërkim i vitit 2016 me mbi 1,100 të rinj zbuloi se ata që thinjeshin herët kishin zakonisht nivele më të larta stresi, por gjithashtu shpesh kishin faktorë të tjerë si sëmundje kronike, konsum alkooli apo histori familjare të thinjave.
Një studim më i avancuar në vitin 2020, i kryer te minjtë, tregoi se stresi aktivizon hormonin norepinefrinë, i cili dëmton qelizat staminale në folikulat e flokëve që prodhojnë pigment. Si rezultat, qimet rriteshin gri. Eksperimentet laboratorike mbi qelizat njerëzore sugjeruan se i njëjti mekanizëm mund të ndodhë edhe tek njerëzit, por studiuesit nuk mund të shkaktojnë qëllimisht stres të lartë tek individët për ta provuar këtë.
Një tjetër studim i vogël te njerëzit në vitin 2021 gjeti se momentet kur flokët thinjeshin përkonin shpesh me periudha të forta stresi në jetën e pjesëmarrësve. Studiuesit e quajtën këtë “provën e parë reale” që stresi mund të luajë rol, të paktën për disa persona. Megjithatë, kërkohen studime më të mëdha për ta konfirmuar.
Edhe nëse lidhja provohet një ditë, është ende e paqartë nëse ulja e stresit mund ta ngadalësojë apo ta kthejë pas procesin.
Në fakt, për shumicën e njerëzve, arsyeja kryesore e thinjave mbetet gjenetika. Nëse prindërit janë thinjur herët, ka shumë gjasa të ndodhë edhe me ju. Gjithashtu, disa sëmundje si vitiligo apo alopecia, problemet me tiroiden, kimioterapia, mungesa e vitaminës B12 dhe D, si edhe faktorë si duhani apo obeziteti, mund të ndikojnë në humbjen e pigmentit.
Mjekët kujtojnë se thinjat janë pjesë natyrale e plakjes dhe nuk duhet parë domosdoshmërisht si diçka negative. Për shumë njerëz – veçanërisht gratë – pranimi i tyre mund të jetë edhe një formë çlirimi nga presionet sociale për t’u dukur gjithmonë të rinj.
