Agjërimi me ndërprerje – ose “fasting”, siç përdoret gjerësisht edhe në shqip – është kthyer në një trend global mirёqёnieje. Edhe pse fjala agjërim ekziston prej kohësh në gjuhën shqipe, shumica e njerëzve preferojnë termin anglisht, duke e bërë atë pjesë të fjalorit të përditshëm. Pavarësisht emrit, fenomeni është i njëjtë: periudha të gjata pa ushqim, të alternuara me një dritare të kufizuar të ngrëni. Por, sa i shëndetshëm është fasting për lëkurën dhe prodhimin e kolagjenit?
Sipas Dr. Susan Judas, specialiste e mjekësisë evolucionare dhe ushqyerjes në Klinikën Tufet në Barcelonë, agjërimi me ndërprerje sjell përfitime të qarta metabolike – sidomos përmes aktivizimit të autofagjisë, procesi natyral i riciklimit qelizor që ul inflamacionin dhe stresin oksidativ. Megjithatë, ekspertja thekson se fasting nuk rrit drejtpërdrejt prodhimin e kolagjenit, siç mendojnë shumë ndjekës të këtij trendi.
Arsyeja është e thjeshtë: gjatë orëve të agjërimit trupi nuk merr aminoacide, që janë bazike për sintezën e kolagjenit. Kjo do të thotë se cilësia e lëkurës varet krejtësisht nga ushqimet që konsumohen gjatë dritares së të ngrënit. Nëse dieta është e varfër në proteina, kolagjeni bie – pavarësisht se sa rreptë zbatoni fasting-un.
Dr. Judas shpjegon se prodhimi i kolagjenit kërkon proteinë të mjaftueshme, aminoacide si glicina, prolina e lizina, si edhe vitaminë C dhe mikronutrientë të tjerë që veprojnë si kofaktorë. Pa këto lëndë ushqyese, trupi nuk ka mundësi të ndërtojë kolagjen në mënyrë efikase.
Nga ana tjetër, fasting mund të përmirësojë lëkurën në mënyrë të tërthortë duke ulur inflamacionin, rritur ndjeshmërinë ndaj insulinës dhe përmirësuar metabolizmin hormonal – por këto efekte nuk e zëvendësojnë dot mungesën e lëndëve ndërtuese.
Ekspertja këshillon që çdo person që praktikon fasting të sigurojë një dritare të tё ushqyerit të pasur me proteina cilësore, fruta të pasura me vitaminë C dhe hidratim të mirë. Ushqime si lëngu i kockave, peshku dhe agrumet janë ndër më të rekomanduarat për të mbështetur kolagjenin gjatë këtij regjimi. Ajo paralajmëron po ashtu se personat mbi 50 vjeç, gratë në menopauzë, dhe atletët duhet të jenë veçanërisht të kujdesshëm për të shmangur humbjen e masës muskulore dhe elasticitetit të lëkurës.
Në fund, Dr. Judas e përmbledh qartë: agjërimi me ndërprerje mund të jetë i dobishëm për shëndetin në shumë nivele, por kolagjeni nuk është një prej tyre – të paktën jo drejtpërdrejt. Për lëkurë të fortë dhe të shëndetshme, baza mbetet një dietë e balancuar, e pasur dhe inteligjente, pavarësisht se cilin version të fasting-ut zgjidhni.
(Burimi: !HOLA!)
