Seanca e sotme në Parlamentin shqiptar, zhvillohet mbi raportet informuese vjetore të drejtuesve të organeve kryesore të drejtësisë: ILD, Prokuroria e Përgjithshme, SPAK.
Pjesa kulmore e përplasjes politike pozitë – opozitë, mbetet SPAK. Pas raportimit të drejtuesit të Prokurorisë së Posaçme kundër Korrupsionit dhe Krimit të Organizuar, Altin Dumani, dhe kthimit të përgjigjeve nga ai, të bëra nga deputetët e PD, shpërthyen debatet.
Sali Berisha, lideri i PD-së dhe i opozitës parlamentare, nuk kurseu as figurat letrare përçmuese për drejtorin e Shkollës së Magjistraturës, Arben Rakipi, as leximet nga iPad-i i “qytetarit digjital” kundër drejtuesit të SPAK, Altin Dumani dhe as kundër kryetarit të grupit parlamentar socialist, Taulant Balla, që e thirri me nofkën e përgjimeve “Tao”.
Gjatë fjalës së tij, Sali Berisha e akuzoi rëndë drejtuesin e SPAK, se mbron kryeministrin Edi Rama dhe se nuk heton aferat më të mëdha korruptive të qeverisë socialiste.
Berisha përmendi disa çështje që, sipas tij, po mbulohen nga drejtësia e “Dumanit”, ku përfshihen afera McGonigal dhe takimi mafioz në Aruba, që sipas kreut të PD, është një takim ku mori pjesë vetë kryeministri Rama.
Berisha akuzoi kreun e SPAK se “nuk guxon të hetojë Edi Ramën” dhe se “është nën ndikimin e avokatit Altin Troplini”, duke nënkuptuar vetë Altin Dumanin, të cilin e cilësoi si avokatin privat të familjes Rama.
Duke cituar nga iPadi i tij, Berisha lexoi pasazhe të shkëputura nga një përgjim transkript i rrjedhur nga hetimet e SPAK, ku në një nga bisedat ndërmjet ish-hetueses në arrati Erjona Daupaj dhe avokatit Radovan Çela, akuzuar për çështjen “Toyota Yaris”, aludohet se Taulant Balla përgojohej nga mesazhet kriminale si “Bundra” që donte të ndikonte hetimet pa paguar.
“Nuk kemi gjë personale ne…” – deklaroi në fjalën e tij Sali Berisha, por iu përvesh Altin Dumanit për një ryshfet 5 milionë euro, për të shpëtuar nga burgu dhe hetimet Kreshnik Farrukun, një të afërm të Fatmir Troplinit, klani kriminal me qendër në rrethinat e Durrësit.
Shpërthimet e Berishës kundër SPAK dhe Altin Dumanit u “sbrapsën” me një gjuhë të përmbajtur nga deputetët e mazhorancës, Toni Gogu, Erjon Braçe, Romina Kuko, por epitetet dhe “iPadi” i kryetarit të opozitës mbetën në “veshët” e medias, ku “Bundra”, “Tao” dhe “Bastardët” zunë vendin e përhershëm sensacional.
