Kryeministri i Shqipërisë, Edi Rama, ka minimizuar shqetësimet e Perëndimit se Rusia po përgatitet për konflikte të reja në Europë, duke theksuar se “do të ishte plotësisht e pamend për cilindo shtet të sulmonte një vend të BE-së apo të NATO-s”.
Në një intervistë për Al Jazeera, dhënë në nisje tё konferencës Berlin Global Dialogue në fund të tetorit, Rama u shpreh se Rusia nuk do të sulmojë Shqipërinë dhe asnjë vend tjetër europian, pasi “NATO është gati për çdo lloj agresioni dhe është ushtria më e fortë në botë”.
Ai theksoi se Bashkimi Europian po përballet çdo ditë me provokime nga Rusia, veçanërisht në vendet kufitare si Polonia, Finlanda, Letonia, Lituania dhe Rumania, që kohët e fundit kanë raportuar inkursione të dyshuara të dronëve rusë. Tensionet u rritën më tej më 19 shtator, kur NATO njoftoi se kishte përgjuar tre avionë rusë MiG-31 që dyshohej se kishin hyrë në hapësirën ajrore të Estonisë – një pretendim që Moska e mohoi.
Rama, i cili ka qenë një kritik i hapur i pushtimit rus të Ukrainës dhe mbështet sanksionet e BE-së ndaj Moskës, shprehu habinë që vetë BE ende nuk ka një plan të qartë paqeje për Ukrainën. “Fakti që BE nuk ka një plan paqeje më duket shumë i çuditshëm,” deklaroi ai.
Duke iu referuar përpjekjeve të presidentit amerikan Donald Trump për të arritur një armëpushim mes Rusisë dhe Ukrainës, Rama tha se “BE-ja duhet të ketë diplomacinë e vet aktive për të promovuar vizionin e saj të paqes” dhe se “duhet të gjendet një mënyrë për të folur me rusët” në funksion të përfundimit të luftës.
Kreu i qeverisë shqiptare shtoi se Shqipëria nuk ndien ndonjë presion të veçantë nga Rusia, pasi vendi “nuk ka frikë dhe nuk ka asnjë ndjenjë simpatie ndaj Moskës”. “Jam shqiptar,” tha Rama. “Ne nuk kemi asnjë arsye për t’u shqetësuar — nuk ka vend për armiqësi ruse në Shqipëri.”
Al Jazeera kujton se, përpara incidenteve të fundit ajrore, Rusia ishte akuzuar prej kohësh për zhvillimin e “luftës hibride” ndaj BE-së përmes sulmeve kibernetike dhe fushatave dezinformuese, si pjesë e strategjisë për të krijuar ndarje brenda unionit.
Në intervistë, Rama gjithashtu komentoi mbi procesin e integrimit europian të Ballkanit Perëndimor, duke përfshirë Shqipërinë, Kosovën, Malin e Zi, Maqedoninë e Veriut, Bosnjën dhe Serbinë — vende që ndodhen në nivele të ndryshme negociatash me BE-në.
Presidentja e Komisionit Europian, Ursula von der Leyen, gjatë një vizite në Tiranë më 25 tetor, vlerësoi progresin e Shqipërisë, duke thënë se “vendi është në rrugën e duhur drejt Bashkimit Europian” dhe se “që nga viti 2022 ka pasur një përshpejtim të jashtëzakonshëm në procesin e reformave”.
Rama e pranoi këtë vlerësim, duke shtuar për Al Jazeera-n se që nga fillimi i luftës në Ukrainë, BE-ja është treguar më e hapur dhe më e gatshme për të mirëpritur vendet e Ballkanit në familjen e saj politike dhe ekonomike.
(Burimi: Al Jazeera, https://www.aljazeera.com/news/2025/11/4/russia-will-not-attack-any-other-european-country-albanian-pm-edi-rama)
