Një situatë alarmante është konfirmuar në frontin e luftës mes SHBA dhe Iranit, ku të paktën dy avionë luftarakë amerikanë F-15 janë goditur, duke ngritur në maksimum nivelin e tensionit dhe shqetësimit në Pentagon.
Sipas raportimeve të fundit nga mediat ndërkombëtare, një avion F-15 është rrëzuar brenda territorit të Iranit, ndërsa fati i njërit prej pilotëve mbetet ende i paqartë. Burime amerikane bëjnë me dije se një pjesëtar i ekuipazhit është shpëtuar, por piloti tjetër rezulton i zhdukur dhe dyshohet se ndodhet në territorin iranian.
Ndërkohë, një incident i dytë është konfirmuar brenda të njëjtës ditë: një tjetër avion ushtarak amerikan është goditur nga forcat iraniane, duke detyruar pilotin të katapultohet jashtë avionit, por këtë herë jashtë territorit të Iranit.
Autoritetet në Teheran kanë marrë menjëherë përgjegjësinë për sulmin, madje duke shkuar edhe më tej: sipas raportimeve, Irani ka ofruar shpërblim për këdo që jep informacion apo dorëzon pilotin amerikan të zhdukur.
Ngjarja ka vënë në lëvizje operacionet e kërkim-shpëtimit nga ushtria amerikane, ndërsa situata mbetet jashtëzakonisht e ndjeshme, pasi bëhet fjalë për një incident që mund të përshkallëzojë edhe më tej konfliktin.
Në Uashington, presidenti Donald Trump nuk ka reaguar ende publikisht për fatin e pilotit, por burime zyrtare kanë lënë të kuptohet se incidenti nuk do të ndikojë në strategjinë ushtarake ndaj Iranit.
Goditja e dy avionëve brenda një harku kaq të shkurtër kohor shihet si një sinjal i fortë nga Irani për kapacitetet e tij mbrojtëse ajrore, ndërsa për SHBA-në kjo përbën një nga momentet më kritike të konfliktit, me rrezikun real të kapjes së një piloti në territor armik – një skenar me pasoja të rënda politike dhe ushtarake.
Situata mbetet në zhvillim, ndërsa priten reagime zyrtare dhe detaje të reja në orët në vijim.
