Lëvizja Vetëvendosje ka vendosur të propozojë ministrin e Jashtëm dhe një nga figurat më të rëndësishme të saj politike, Glauk Konjufcën, si kandidat për President të Kosovës. Vendimi është bërë publik përmes një deklarate zyrtare të partisë së kryeministrit Albin Kurti, duke sinjalizuar se mazhoranca po shkon drejt një emri të brendshëm pasi përpjekjet për një kandidat konsensual me opozitën kanë dështuar.
Propozimi për Konjufcën vjen në një moment politik delikat, pasi lëvizja interpretohet nga shumë analistë si një distancim i qartë nga presidentja aktuale Vjosa Osmani, e cila në të kaluarën ka pasur mbështetje të fortë nga Vetëvendosje. Me këtë hap, partia në pushtet duket se ka vendosur të investojë politikisht nё një figurë tё vetën për postin më të lartë shtetëror.
Në reagimin zyrtar, Vetëvendosje argumenton se propozimi erdhi vetëm pasi dështuan përpjekjet për të gjetur një emër që do të mund të mbështetej nga të gjitha palët politike në Kuvend. Sipas partisë, gjatë javëve të fundit janë zhvilluar disa ftesa për takime me subjektet kryesore opozitare për të diskutuar emra të mundshëm, por nga ana e tyre nuk është paraqitur asnjë kandidat konkret.
Në këto kushte, si parti fituese e zgjedhjeve të fundit parlamentare, Vetëvendosje vendosi të propozojë një nga figurat më të rëndësishme të saj. Në deklaratë thuhet se kandidatura për President do të jetë Glauk Konjufca, aktualisht ministër i Punëve të Jashtme dhe Diasporës, ish-kryetar i Kuvendit dhe një nga politikanët më të votuar në historinë e Kosovës.
Partia e Kurtit thekson se zgjedhjet e 28 dhjetorit 2025 dhanë një mandat të qartë për ndërtimin e institucioneve të reja, pas një periudhe të gjatë bllokade politike. Sipas Vetëvendosjes, Kuvendi dhe Qeveria janë konstituuar pa vonesa, ndërsa procesi i radhës është zgjedhja e Presidentit të Republikës.
Megjithatë, për zgjedhjen e kreut të shtetit kërkohet pjesëmarrja e të paktën 80 deputetëve në sallë, gjë që e bën të domosdoshme bashkëpunimin mes mazhorancës dhe opozitës.
Pavarësisht shpalljes së kandidaturës së Konjufcës, Vetëvendosje ka bërë edhe një tjetër thirrje publike ndaj partive opozitare që të paraqesin emra alternativë nëse dëshirojnë një proces më konsensual. Madje, partia në pushtet është shprehur e gatshme të ndihmojë edhe me nënshkrimet e nevojshme për regjistrimin e një kandidature të opozitës.
Në deklaratë theksohet se zgjedhjet e reja parlamentare do të ishin një skenar i panevojshëm për vendin dhe se ende ekziston mundësia që forcat politike të arrijnë një marrëveshje për zgjedhjen e Presidentit.
Tashmë mbetet për t’u parë nëse kandidatura e Glauk Konjufcës do të arrijë të marrë mbështetjen e nevojshme në Kuvend apo nëse procesi do të hapë një tjetër fazë përplasjesh politike në Prishtinë.
