Pas 8 muajve që përfunduan zgjedhjet e përgjithshme në Kosovë, politika antagoniste fitoi. Krahët politikë fitues dhe humbës të zgjedhjeve të shkurtit, nuk pranuan marrëveshje për bashkëqeverisje.
Qeveria “Kurti” e propozuar nga fituesit e zgjedhjeve LVV (Partia Vetëvendosje), nuk mori 61 votat e nevojshme. 56 deputetë votuan pro, 52 kundër.
Sipas Kushtetutës së Republikës së Kosovës, brenda 10 ditësh, presidentja Vjosa Osmani duhet të mbledhë partitë për të caktuar një mandatar tjetër. Nëse sërish dështon formimi i qeverisë së re, vendi duhet të mbajë brenda 40 ditësh zgjedhjet e parakohshme.
“Asnjë nga partitë parlamentare që u bëmë ftesë nuk ka pranuar të hyjë në marrëveshje për bashkëqeverisje… Pa votimin e qeverisë së re, Republika rrezikon të shkojë në zgjedhje të reja.”, tha Albin Kurti në Kuvend pas dështimit të krijimit të qeverisë së re.
Forca e dytë e dalë nga zgjedhjet e 9 shkurtit është PDK-ja e Memli Krasniqit, por ky i fundit, në një prononcim për mediat pas mbylljes së seancës, la të kuptohet se nuk do të marrë mandatarin e ri për të formuar qeverinë e re pasi as ai nuk e ka shumicën dhe se duhet të shkohet menjëherë në zgjedhje të parakohshme.
Në këto kushte, zgjidhja e vetme për Kosovën duket se janë zgjedhjet e parakohshme dhe, deri atëherë, qeveria “Kurti” në detyrë do të vazhdojë të qeverisë me një mandat “afrofe”.
