Ndërprerjet e shërbimeve të Amazon Web Services (AWS) kanë shkaktuar kaos në mbarë botën, duke nxjerrë jashtë funksioni dhjetëra faqe dhe aplikacione të njohura si Signal, Coinbase, Robinhood, Zoom, Fortnite, Canva dhe Duolingo, ndërkohë që miliona përdorues kanë raportuar probleme me aksesin në internet.
Në një njoftim të fundit, kompania deklaroi se ka identifikuar shkakun kryesor të problemit dhe se ka arritur të rregullojë pjesërisht defektin, por rikthimi i plotë i shërbimeve po vijon me vështirësi. AWS tha se po “vëzhgon përmirësim të ndjeshëm në të gjitha shërbimet”, por paralajmëroi se disa klientë do të vazhdojnë të përballen me ndërprerje sporadike.
Sipas faqes së monitorimit Downdetector, që nga nisja e defektit janë regjistruar mbi 11 milionë raportime për probleme të lidhjes në mbarë botën. Edhe pse shumë platforma – si Reddit, Xfinity dhe Roblox – kanë rifilluar punën normalisht, përdoruesit vijojnë të raportojnë ngadalësi dhe gabime të shërbimeve që mbështeten në infrastrukturën e AWS-së.
Amazon ka sqaruar se defekti duket të ketë origjinën në rrjetin e brendshëm EC2, që përbën zemrën e sistemit të saj cloud, ndërsa përjashton mundësinë e një sulmi kibernetik. AWS, pjesë e grupit Amazon, është një nga ofruesit më të mëdhenj të kompjuterizimit në “re”, që furnizon me fuqi llogaritëse, ruajtje të të dhënave dhe shërbime digjitale miliona kompani, institucione dhe përdorues në mbarë globin. Ndërprerjet në serverët e saj ndikojnë zinxhir mbi shumë faqe e aplikacione që varen nga kjo infrastrukturë.
Ekspertët paralajmërojnë se pasojat ekonomike të ndërprerjes janë të konsiderueshme. Mehdi Daoudi, drejtor ekzekutiv i kompanisë së monitorimit të performancës së internetit Catchpoint, tha për CNN se “humbjet financiare mund të arrijnë në qindra miliarda dollarë, për shkak të uljes së produktivitetit të miliona punonjësve dhe pezullimit të operacioneve në kompani të tëra – nga linjat ajrore deri te fabrikat”. Sipas tij, incidenti tregon “sa i ndërlikuar dhe i brishtë është interneti dhe sa shumë mbështetet ekonomia globale në funksionimin e tij”.
Përveç shërbimeve të Amazon-it vetë – Prime Video, Alexa dhe platforma e shitjeve online patёn ndёrprerje. Probleme u raportuan edhe nga Lyft, Robinhood, Signal, Coinbase, si dhe disa banka të mëdha në Mbretërinë e Bashkuar.
Ekspertë të tregut kanë theksuar se incidenti ngre pyetje serioze për pёrqёndrimin e lartë të tregut të shërbimeve cloud, ku AWS kontrollon rreth 30 % të tregut botëror, ndërsa Microsoft Azure dhe Google Cloud mbajnë përkatësisht 20 % dhe 13 %.
Megjithëse Amazon ka konfirmuar se pjesa më e madhe e sistemeve po kthehet në normalitet, shërbimet e ndjeshme ndaj vonesave, si platformat e tregtimit dhe komunikimit në kohë reale, mund të kenë nevojë për orë apo ditë për t’u stabilizuar plotësisht.
(Burimi: Al Jazeera)
