Pesë këshilla për të parandaluar çarjen e buzëve nga të ftohtit
Me uljen e temperaturave dhe afrimin e motit të ftohtë, lëkura ka nevojë për më shumë kujdes për të mbetur e shëndetshme dhe e mbrojtur nga irritimet. Krahas fytyrës dhe duarve, buzët janë ndër zonat më të ndjeshme dhe më të prekshme nga tharja dhe çarjet, për shkak se ato nuk prodhojnë yndyrë natyrale dhe nuk kanë melaninë që t’i mbrojë nga faktorët e jashtëm.
Farmacistët dhe ekspertët e dermokozmetikës theksojnë se kujdesi ndaj buzëve duhet të jetë po aq specifik sa ai për zonat delikate të fytyrës, si konturi i syve. Sipas tyre, struktura e hollë dhe e brishtë e lëkurës së buzëve i bën ato më të pambrojtura ndaj të ftohtit, duke sjellë ndjesi tërheqjeje dhe shfaqjen e çarjeve të dhimbshme.
Përtej përdorimit të balsamëve dhe mbrojtjes fizike nga i ftohti, njohuni edhe me pesë këshilla praktike për të siguruar buzë të shëndetshme gjatë muajve të ftohtë:
Qëndroni të hidratuar
Hapi bazë për të ruajtur shëndetin e buzëve është hidratimi. “Balsamët dhe serumet hidratuese duhet të jenë gjithashtu rigjeneruese, sepse bëhet fjalë për një membranë mukoze që dëmtohet shumë lehtë”, shpjegojnë specialistët. Produktet e duhura ndihmojnë në ushqimin dhe zbutjen e buzëve.
Eksfolim javor
Një piling i butë një herë në javë ndihmon në heqjen e qelizave të vdekura, duke e lënë lëkurën më të butë dhe të përgatitur për të thithur më mirë produktet hidratuese. Ekspertët nënvizojnë se ky proces duhet bërë gjithmonë me delikatesë për të shmangur irritimin.
Mos i lagni buzët me pështymë
Një zakon i përhapur, por shumë i dëmshëm. Pështyma përmban enzima që shpërbëjnë yndyrnat dhe proteinat, duke përshpejtuar tharjen dhe duke favorizuar çarjet apo edhe shfaqjen e herpesit. Lagia e vazhdueshme e buzëve është armiku më i madh i tyre.
Mbrojtje fizike nga i ftohti
Një mënyrë e thjeshtë, por efektive është mbulimi i buzëve me shall ose jakë në ditët me temperatura shumë të ulëta, duke krijuar një barrierë ndaj erës dhe të ftohtit të fortë.
Kini kujdes me vazelinën
Edhe pse shumë e përdorur, vazelina nuk është gjithmonë zgjidhja ideale. Ajo krijon një shtresë izoluese që pengon humbjen e lagështisë dhe mbron nga faktorët e jashtëm, por nuk ofron rigjenerim. Është e dobishme vetëm nëse buzët janë tashmë të shëndetshme. Ndaj rekomandohen produkte me përbërës natyralë si mjaltë, gjalpë shea dhe aloe vera, ndërsa sugjerohet shmangia e substancave irrituese si mentoli.
Me ndjekjen e këtyre këshillave, buzët mund të qëndrojnë të buta, të hidratuara dhe të shëndetshme gjatë gjithë dimrit, duke shmangur dhimbjet dhe çarjet e thella.
