Pandora, marka më e madhe e bizhuterive në botë për nga volumi i shitjeve, po ndryshon strategjinë e prodhimit për shkak të rritjes së madhe të çmimeve të argjendit. Kompania njoftoi se do të prodhojë më shumë byzylykë dhe produkte të tjera me veshje platini, në një përpjekje për të ulur kostot dhe për të shmangur varësinë nga një metal që është bërë jashtëzakonisht i shtrenjtë.
Çmimi i argjendit ka arritur rreth 80 dollarë për ons – më shumë se dyfishi krahasuar me një vit më parë – duke luhatur ndjeshëm tregjet. Edhe ari është rritur, por jo me të njëjtin ritëm, pasi investitorët kërkojnë asete të sigurta në një klimë gjeopolitike të paqëndrueshme.
Për një kompani që ndërton identitetin mbi konceptin e “luksit të përballueshëm”, kjo rritje e shpejtë ka vënë në vështirësi modelin e biznesit. Pandora blen mbi 300 tonë argjend çdo vit, ndaj çdo luhatje ndikon drejtpërdrejt në fitime.
Drejtoresha ekzekutive, Berta de Pablos-Barbier, theksoi se mbështetja e tepërt te një mall i vetëm është e rrezikshme për çdo biznes. Sipas planit të ri, brenda një viti të paktën gjysma e produkteve që aktualisht përdorin argjend do të kalojnë në një aliazh metalik të veshur me platin, duke zbutur një pjesë të madhe të rritjes së kostove.
Edhe platini është shtrenjtuar, por shumë më pak – rreth 3% këtë vit, duke arritur në afro 2,100 dollarë për ons – një rritje modeste krahasuar me kapёrcimin dyshifror të argjendit.
Ndërkohë, kompania po përballet edhe me sfida të tjera. Shitjet janë ndikuar nga një konsum më i kujdesshëm, sidomos në SHBA, ndërsa tarifat tregtare të vendosura ndaj produkteve të prodhuara në Tajlandë kanë goditur rëndë performancën financiare. Pandora realizon një pjesë të madhe të prodhimit atje dhe shet gjerësisht në tregun amerikan.
Të ardhurat e vitit të kaluar arritën në rreth 5.1 miliardë dollarë, me një rritje modeste prej 2%, ndërsa fitimi mbeti pothuajse i pandryshuar. Kompania pret që rritja e shitjeve këtë vit të jetë minimale.
Pas shpalljes së tarifave globale, aksionet e Pandora-s kanë humbur më shumë se gjysmën e vlerës, ndërsa rritja e çmimit të argjendit ka ushtruar presion shtesë mbi tregun e saj.
Për vitin 2026, kompania ka siguruar një pjesë të madhe të nevojave për argjend përmes kontratave me çmime të paracaktuara, por rreziku mbetet kur këto marrëveshje të përfundojnë. Deri atëherë, Pandora synon ta ketë përshpejtuar kalimin drejt platinit.
Sipas drejtuesve, konsumatorët nuk pritet të humbasin nga ky ndryshim. Përkundrazi, platini është më rezistent ndaj korrozionit dhe nuk nxihet, duke e bërë më të përshtatshëm për përdorim të përditshëm – pa rritur ndjeshëm çmimin përfundimtar.
(Burimi: The New York Times)
