Kreu i Reform UK, Nigel Farage, ka paralajmëruar se do të votojë kundër çdo vendimi për dërgimin e trupave britanike paqeruajtëse në Ukrainë, edhe nëse arrihet një marrëveshje armëpushimi mes Kievit dhe Moskës. Qëndrimi i tij e vë atë drejtpërdrejt kundër kryeministrit britanik Keir Starmer, ndërsa njëkohësisht ai ka kritikuar edhe ish-aleatin e tij politik, Donald Trump, për deklaratat mbi Groenlandën.
Duke folur për Times Radio, Farage tha se një angazhim ushtarak britanik në Ukrainë do ta linte Mbretërinë e Bashkuar “plotësisht të ekspozuar” në planin e sigurisë kombëtare. Sipas tij, Britania nuk ka as fuqinë njerëzore dhe as pajisjet e nevojshme për t’u përfshirë në një mision pa një afat të qartë përfundimi.
“Unë do të votoja kundër,” u shpreh Farage. “Nuk kemi as numrin e ushtarëve dhe as kapacitetet për të hyrë në një operacion që nuk ka një fund të përcaktuar.”
Përplasja me Starmerin
Deklaratat e Farage vijnë pasi Starmer u zotua në Parlament se deputetët do të kenë fjalën e fundit për çdo vendim që lidhet me vendosjen e trupave britanike në Ukrainë, në kuadër të një marrëveshjeje sigurie të negociuar me Francën. Sipas këtij plani, Londra dhe Parisi do të vendosnin forca paqeruajtëse për të garantuar respektimin e një armëpushimi të mundshëm mes presidentit ukrainas Volodymyr Zelensky dhe homologut të tij rus Vladimir Putin.
Marrëveshja parashikon që Shtetet e Bashkuara të kenë rol monitorues të përgjithshëm, por pa dislokim trupash tokësore.
Starmer mbrojti planin duke deklaruar në Dhomën e Komuneve se numri i trupave do të përcaktohet në bazë të planeve ushtarake dhe në bashkëpunim me vende të tjera aleate. “Çdo shifër do t’i paraqitet Parlamentit për miratim përpara se të ketë një dislokim,” tha ai.
Farage, megjithatë, argumenton se nëse do të kishte një koalicion të gjerë ndërkombëtar me tetë, dhjetë apo më shumë vende, atëherë situata do të ishte ndryshe. “Në kushtet aktuale, rrezikojmë të mbetemi vetëm ne dhe francezët, të ekspozuar për një periudhë të pacaktuar,” theksoi ai.
Distancim edhe nga Trump për Groenlandën
Megjithëse njihet si një figurë politike e afërt me Trumpin, Farage nuk kurseu kritikat ndaj presidentit amerikan për deklaratat e tij lidhur me një aneksim të mundshëm të Groenlandës duke e shkёputur nga Danimarka. Ai e cilësoi një veprim të tillë si “të papranueshëm” dhe “skandaloz”, duke u distancuar qartë nga kjo ide.
Një profil politik gjithnjë e më konfrontues
Qëndrimet e fundit e vendosin Farage në një pozicion të pazakontë: kundër kryeministrit britanik për Ukrainën dhe kundër Trumpit për Groenlandën. Në të dy rastet, ai justifikon qëndrimin e tij me argumentin e mbrojtjes së interesit kombëtar britanik dhe shmangies së përfshirjeve ushtarake apo gjeopolitike që, sipas tij, mund të kenë pasoja të rënda afatgjata.
Debati për rolin e Britanisë në Ukrainë pritet të intensifikohet në javët në vijim, ndërsa çdo vendim për dërgimin e trupave do të kalojë përmes një votimi të ashpër parlamentar, ku zëri kundërshtues i Nigel Farage duket se do të jetë ndër më të fortët.
(Burimi: THE SUN)
