Ndërsa përplasja SHBA–Izrael me Iranin po thellon pasigurinë në Lindjen e Mesme, Dubai – një nga qendrat më të mëdha të luksit dhe financës globale – po përballet me një eksod të papritur të banorëve më të pasur.
Mijëra individë me pasuri të lartë neto po largohen me nxitim nga Emiratet, duke kërkuar të mbrojnë kapitalet e tyre dhe të gjejnë strehë më të sigurt, kryesisht në Europë dhe në sistemin bankar zviceran. Një qytet që deri dje shihej si simbol i stabilitetit, taksave të ulëta dhe jetës luksoze, tani po humbet shkëlqimin për shkak të rrezikut në rritje nga konflikti rajonal.
Pamjet e infrastrukturës së goditur dhe kërcënimi i vazhdueshëm nga dronët dhe raketat kanë mjaftuar për të tronditur besimin e elitës globale, e cila prej vitesh e kishte kthyer Dubain në një strehë të sigurt financiare dhe jetese.
Sekretarja e Brendshme britanike, Yvette Cooper, bëri të ditur se rreth 100 mijë shtetas britanikë janë larguar nga Dubai që nga nisja e konfliktit. Megjithatë, kthimi në Mbretërinë e Bashkuar nuk është opsioni më i preferuar për shumë prej tyre, për shkak të barrës së lartë fiskale me tё cilёn mund të përballen.
Me vitin fiskal drejt fundit, shumë prej këtyre rezidentëve kanë konsumuar tashmë ditët që u lejojnë të shmangin detyrimet tatimore në Britani, ndaj po orientohen drejt alternativave të tjera europiane. Franca dhe Irlanda po shfaqen si destinacione të preferuara për një strehë të përkohshme, duke ofruar një balancë mes sigurisë dhe kushteve më të favorshme.
Ndryshimi i klimës së sigurisë ka ndikuar edhe në turizëm. Pushues të pasur që kishin planifikuar të kalonin festat e Pashkëve në Dubai apo Abu Dhabi po i anulojnë rezervimet dhe po zhvendosen drejt destinacioneve klasike europiane si Majorka dhe Ibiza.
“Brenda më pak se 48 orësh nga shpërthimi i krizës, mora një numër të jashtëzakonshëm kërkesash nga klientë që kishin rezervuar në Dubai ose Abu Dhabi dhe i anuluan menjëherë,” u shpreh për Bild agjenti i pasurive të paluajtshme luksoze në Majorka, Marcel Remus. “Tani të gjithë duan të rikthehen në Majorka.”
Me sa duket, edhe qendrat më të forta të luksit dhe kapitalit global nuk janë të imunizuara ndaj pasigurive gjeopolitike, dhe në momente krize, miliarderët zgjedhin të largohen të parët!
(Burimi: Daily Mail)
