Një atentat i rëndë mafioz ka ndodhur këtë të martë, rreth orës 14:20, pranë rrethrrotullimit të aeroportit të Rinasit, ku mbeti i vrarë ish-i dënuari për krim të organizuar Gilmando Dani, 47 vjeç, ndërsa u plagos rëndë Muçi Shaljani (Sheqeri), rreth 40 vjeç, qё sipas tё dhёnave tё pakonfirmuara ende, mund tё jetё punonjës i Agjencisë së Mbikëqyrjes Policore (AMP).
Sipas burimeve zyrtare të Policisë së Tiranës, persona ende të paidentifikuar kanë qëlluar me breshëri armësh automatike ndaj automjetit me të cilin po lëviznin Dani dhe Shaljani. Si pasojë e të shtënave, Dani humbi jetën në vend, ndërsa Shaljani u transportua me urgjencë drejt spitalit, në gjendje kritike për jetën. Autorët janë larguar menjëherë pas krimit me një automjet tip Toyota me targa greke, i cili më pas është gjetur i djegur në fshatin Halil të Krujës.
Viktima, Gilmando Dani, ishte një prej njerëzve më të afërt të Emiljano Shullazit dhe kishte dalë nga burgu dy vite më parë, pas dënimit me 12 vite për “shtrëngim me anë të kanosjes për marrje pasurie” në kuadër të një “grupi të strukturuar kriminal”. Ai kishte mbërritur në Shqipëri vetëm pak orë më parë nga Spanja, ndërsa sipas burimeve, autorët kishin ndjekur itinerarin e tij dhe kishin ngritur pritën sapo ai doli nga aeroporti.
Në pamjet që qarkullojnë nё media nga vendi i ngjarjes, shihet momenti kur forcat e policisë mbërrijnë në vend dhe përpiqen të hapin derën e automjetit të blinduar ku ndodheshin viktimat. Ajo që bie në sy për çdo sy të vëmendshëm është fakti se efektivët thyen xhamin e makinës me shkelma, pa asnjë mjet pune apo pajisje speciale në dorë — një pamje që flet shumë për gjendjen reale të strukturave tona të rendit.
Në një situatë ku sekondat janë jetike për të shpëtuar një të plagosur, mungesa e mjeteve profesionale dhe e reagimit të koordinuar bën diferencën mes jetës dhe vdekjes. Përveçse u rrezikua ndihma e parë për të plagosurin, veprime të tilla dëmtojnë edhe provat e vendngjarjes, duke e kontaminuar një skenë që duhej ruajtur me rigorozitet maksimal.
Këto pamje, që sot kanë bërë xhiron e mediave, nuk tregojnë vetëm brutalitetin e një atentati mafioz në mes të ditës, por edhe pajisjen, përgatitjen dhe profesionalizmin e kufizuar të policisë shqiptare, e cila shpesh gjendet e pambrojtur dhe e papajisur për të menaxhuar situata të tilla.
