Një ngjarje e rëndë kriminale tronditi Elbasanin mbrëmjen e së dielës, ku një biznesmen lokal u ekzekutua në zonën e Unazës Jugore të qytetit. Viktima është identifikuar si Edmond Mëhalla, sipërmarrës me disa aktivitete biznesi në fushën e shërbimeve dhe karburanteve.
Sipas burimeve nga policia, ngjarja ndodhi pranë një karburanti në lagjen “Emin Matraxhiu”, ku Mëhalla ndodhej brenda një automjeti. Autorët dyshohet se janë dy persona, të cilët janë larguar menjëherë pas sulmit. Hetimet paraprake sugjerojnë se atentati mund të ketë qenë i planifikuar.
Mëhalla ishte pronar i “Hollywood Lounge Bar”, “Xhaxhi Oil”, si dhe i një kompanie taksish dhe transporti lokal. Ai ndërroi jetë në vendngjarje.
Policia e Elbasanit ka reaguar menjëherë duke ngritur pika kontrolli në të gjitha hyrje-daljet e qytetit dhe duke sekuestruar pamje nga kamerat e sigurisë që mbulojnë zonën, e cila njihet si një nga akset më të frekuentuara të qytetit.
Rrethanat e ngjarjes dhe motivi i mundshëm mbeten ende të paqarta. Nuk ka ende persona të shoqëruar si të dyshuar, ndërsa janë marrë në pyetje dëshmitarë që ndodheshin pranë vendit të ngjarjes.
Grupi hetimor po punon për të rikonstruktuar dinamikën dhe origjinën e sulmit.
