Një avokat zviceran dhe ish-drejtues i lartë i firmës panameze të avokatisë Mossack Fonseca – e cila u bë qendra e skandalit global “Panama Papers” – pritet të dalë para gjykatës gjermane vitin e ardhshëm. Lajmi u bë i ditur nga mediat ZDF, Tamedia dhe Der Standard.
Christoph Zollinger, 56 vjeç, do të gjykohet në mars të vitit 2026 në Gjykatën Rajonale të Këlnit. Sipas një deklarate të gjykatës, ai akuzohet për “krijim të organizatave kriminale dhe ndihmë në shmangien e taksave në dy raste”. Prokuroria pretendon se skema ka shkaktuar një dëm tatimor rreth 13 milionë euro, të lidhur me 50 kompani offshore.
Një nga figurat kryesore të Mossack Fonseca-s
Zollinger ishte për vite me radhë ndër tre drejtuesit më të lartë të firmës Mossack Fonseca. Në vitin 2016, konsorciumi ndërkombëtar i gazetarëve ICIJ, në bashkëpunim me Süddeutsche Zeitung dhe mbi 100 media botërore, zbuluan përmes rrjedhjes së 11.5 milionë dokumenteve konfidenciale se si firma ndihmonte politikanë, biznesmenë të njohur, yje të showbiz-it dhe persona të dënuar për mashtrim të krijonin kompani fantazmë në parajsa fiskale.
Zollinger iu bashkua firmës në 1997 dhe më vonë u bë partner. Ai kishte marrë shtetësinë panameze, ishte martuar me një shtetase të Panamasë dhe ishte emëruar “ambasador i posaçëm”, sipas mediave gjermane.
Edhe pse ishte larguar nga Mossack Fonseca vite para publikimit të “Panama Papers”, dokumentet e bёra publike treguan se ai kishte marrë pjesë në disa nga vendimet më të diskutueshme të kompanisë – mes tyre bashkëpunimi me biznesmenin sirian të sanksionuar Rami Makhlouf, kushëriri i Bashar al-Assad-it. Në vitin 2011, pavarësisht sanksioneve të SHBA-së, Zollinger i doli në mbrojtje Makhlouf-it, deklarata të cilat më vonë i quajti “tё gabuara”.
Hetimet dhe akuza aktuale
Në vitin 2020, autoritetet gjermane lëshuan një urdhër ndërkombëtar arresti ndaj tij. Në atë kohë, ai jetonte në Zvicër, ku merrej me restaurim banesash të vjetra dhe shkruante një roman thriller me pseudonimin “Christoph Martin”. Sipas Der Standard, urdhri i arrestit u pezullua në vitin 2024.
Gjykata gjermane thekson se Zollinger dyshohet të ketë qenë pjesë e një grupi që, kundrejt pagesës, organizonte krijimin e kompanive offshore për klientë në mbarë botën, duke i ngritur ato në Panama ose juridiksione të tjera të njohura si “parajsa fiskale”. Nëse shpallet fajtor, ai rrezikon deri në shtatë vjet e gjysmë burg.
Mossack Fonseca pezulloi aktivitetin në vitin 2018, pas presionit të madh mediatik, bastisjeve dhe gjobave të shumta. Vitin e kaluar, gjykatat panameze mbyllën një proces të bujshëm për pastrim parash të lidhur me “Panama Papers”, duke shpallur të pafajshëm të gjithë të pandehurit, përfshirë bashkëthemeluesin Jürgen Mossack. Ndërsa akuzat ndaj themeluesit tjetër, Ramón Fonseca, u pushuan pas vdekjes së tij.
(Burimi: ICIJ- The International Consortium of Investigative Journalists)
