Bashkimi Evropian ka miratuar një paketë të re rregullash për mbrojtjen e shëndetit dhe mirëqenies së qenve dhe maceve, duke vendosur për herë të parë standarde unike për mbarështimin, gjurmueshmërinë dhe importin e kafshëve të shoqërimit në të gjithë territorin e BE-së. Marrëveshja u arrit mes Parlamentit Evropian dhe Këshillit Evropian dhe përbën një hap të rëndësishëm drejt forcimit të kontrollit dhe transparencës në tregun e kafshëve shtëpiake.
Një nga masat kryesore të paketës është identifikimi i detyrueshëm me mikroçip për të gjithë qentë dhe macet, përfshirë edhe ato në pronësi private, si dhe regjistrimi i tyre në baza të dhënash kombëtare të ndërveprueshme. Mbarështuesit profesionalë, shitësit dhe strehёt e kafshёve kanë katër vjet kohë për t’u përshtatur me rregullat e reja, ndërsa pronarët privatë do të jenë të detyruar t`i pajisin kafshёt e tyre shtёpiake me mikroçipa pas dhjetë vjetësh për qentë dhe pesëmbëdhjetë vjetësh për macet.
Marrëveshja parashikon gjithashtu ndalimin e mbajtjes së kafshëve të lidhura në mënyrë të përhershme dhe ndalimin e përdorimit të qaforeve me dhëmbë ose atyre me mbërthim, të cilat konsiderohen të dhunshme dhe të dëmshme. Në lidhje me importet, rregullat do të zbatohen edhe për lëvizjet jo-komerciale për të parandaluar hyrjen në BE të kafshëve të deklaruara gabimisht si të destinuara për përdorim personal, por që në të vërtetë synohen për shitje.
Për të luftuar praktikat abuzive të mbarështimit, projektligji ndalon çiftëzimin midis kafshëve të afërta në gjak — si prindër dhe pasardhës, gjyshër e nipër, vëllezër e motra apo gjysmë-vëllezër — si dhe ndalon mbarështimin për karakteristika estetike që shkaktojnë probleme të rënda shëndetësore për kafshët.
Ndërkohë, qentë dhe macet e importuara nga vendet e treta për shitje duhet të pajisen me mikroçip përpara hyrjes në BE dhe të regjistrohen në bazat e të dhënave të vendeve pritëse, në mënyrë që të garantohet gjurmueshmëria dhe kontrolli veterinar.
Kёto rregulla tё reja synojnё të frenojnë abuzimet në tregun europian me tregtimin e kafshëve shtëpiake, i cili ka njohur rritje të kërkesës dhe operimit informal gjatë viteve të fundit.
(Burimi: ANSA)
