Zëvendëskryeministrja dhe ministrja e Infrastrukturës dhe Energjisë, Belinda Balluku, është paraqitur sot në ambientet e Prokurorisë së Posaçme kundër Korrupsionit dhe Krimit të Organizuar (SPAK).
Burime pranë organit të akuzës bëjnë me dije se Balluku është thirrur për t’u njohur me akuzën zyrtare që rëndon mbi të, atë të “Shkeljes së barazisë në tenderat publikë”, një vepër penale që parashikon përgjegjësi për shkelje të rregullave të konkurrencës dhe favorizim në procedurat e prokurimeve shtetërore.
Ministrja nuk ka dhënë asnjë deklaratë për mediat në hyrje të SPAK-ut, ndërsa përfaqësimin ligjor e ka kryer avokatja Pamela Qirko, e cila është njëkohësisht motra e saj. Qirko ka mbërritur më herët në ambientet e prokurorisë speciale.
Pamela Qirko është e njohur për publikun si ish-kryetare e Komisionit të Pavarur të Kualifikimit (KPK), një prej institucioneve kyçe të procesit të vettingut në drejtësi.
Hetimet ndaj Ballukut janë pjesë e një dosjeje të gjerë të SPAK-ut që lidhet me procedurat e tenderimit në Ministrinë e Infrastrukturës dhe Energjisë, si dhe në ARRSH. Çështja u intensifikua pas arrestimit të disa ish-vartësve të saj, të cilët akuzohen për abuzime në tendera publikë dhe shkelje të procedurave ligjore.
Ndërkohë, zhvillimi ka shkaktuar reagime të menjëhershme në arenën politike. Kreu i opozitës, Sali Berisha, ka denoncuar publikisht se Kryeministri Edi Rama ka ushtruar presion ndaj prokurorit të SPAK-ut, Dritan Premçi, i cili po heton çështjen që përfshin zëvendëskryeministren. Deri më tani, as Kryeministria dhe as SPAK nuk kanë dhënë një reagim zyrtar për këto pretendime.
Belinda Balluku është një nga figurat më të rëndësishme të kabinetit qeveritar dhe një ndër bashkëpunëtoret më të afërta të kryeministrit Rama. Ajo drejton Ministrinë e Infrastrukturës dhe Energjisë që prej vitit 2019 dhe ka mbajtur gjithashtu postin e zëvendëskryeministres.
SPAK pritet të bëjë publike në ditët në vijim detaje të mëtejshme mbi akuzën dhe ecurinë e hetimeve.
Z. Dritan Prençi, prokuror i përkohshëm në Prokurorinë pranë Gjykatës së Shkallës së Parë për Krime të Rënda Tiranë
