Alice dhe Ellen Kessler, të njohura në mbarë Evropën si Binjaket Kessler, ishin nga figurat më të famshme të skenës dhe televizionit të viteve 1950–1970. Me paraqitjet e tyre të suksesshme dhe koreografitё qё i performonin në mënyrë identike, ato u bënë ikona kulturore, të pandashme në jetën profesionale dhe private. Megjithatë, pavarësisht famës dhe suksesit, të dyja vendosën të mos martoheshin dhe të mos krijonin familje – një vendim i ndikuar thellësisht nga përvojat e vështira të fëmijërisë.
“Ne nuk donim familje, nuk donim të ishim të varura. E pamë këtë me nënën tonë, e cila ishte skllave e babait tonë. Nëse shapkat nuk ishin aty ku ai donte, kishte sherr. Kjo të formon si fëmijë,” tregoi dikur Alice Kessler për revistën gjermane “Frau im Spiegel”.
Edhe pse zgjodhën të mos martoheshin, të dyja motrat përjetuan histori të gjata dashurie me figura të njohura të artit evropian. Ellen Kessler ishte në një lidhje më shumë se 20-vjeçare me aktorin italian Umberto Orsini, ndërsa Alice u lidh me këngëtarin francez të muzikës së lehtë Marcel Amont. Lidhjet nisën në vitet 1960, kur binjaket ishin tashmë të afirmuara në skenën italiane dhe franceze, megjithatë fotot e tyre si çifte janë të rralla.
Në një intervistë, Ellen kujtoi: “Kam qenë në një lidhje me Umberto Orsinin për 20 vjet, por gjithmonë isha në lëvizje. Në fillim më propozoi dhe i thashë ‘Po’, por për fat të mirë nuk e përmendi më kurrë. U gëzova që nuk u përpoq të më lidhte.”
Por motrat Kessler përjetuan edhe tradhtinё nga partnerët e tyre. “Burrat janë të dobët, duan të adhurohen,” citohet të kenë thënë për gazetën gjermane “Die Zeit”. Në momente të tjera, ato pranuan se nuk i pëlqenin gjithmonë partnerët e njëra-tjetrës, edhe pse lidhjet e tyre zgjatën dekada.
Umberto Orsini, partneri i dikurshëm i Ellen, është ende gjallë në moshën 91-vjeçare. Ndërsa Marcel Amont, ish-partneri i Alice, u nda nga jeta në vitin 2023 në moshën 93-vjeçare.
Alice dhe Ellen Kessler ndërruan jetë së fundmi në moshën 89-vjeçare, duke lënë pas një trashëgimi të pamasё në botën e spektaklit: elegancën e tyre, identitetin artistik të veçantë dhe historinë e dy grave që mbrojtën autonominë e tyre personale në një epokë kur kjo shihej si e pazakontë.
(Burimi: Merkur.de)
