Pema gjigante e Krishtlindjeve në Bethlehem u ndez mbrëmjen e së shtunës, për herë të parë që nga fillimi i luftës në Gaza, duke tërhequr një turmë të madhe qytetarësh të mbledhur pranë Kishës së Lindjes.
Për dy vite me radhë, të gjitha festimet publike të Krishtlindjes ishin anuluar në Bethlehem – qytetin në Bregun Perëndimor të pushtuar, ku të krishterët besojnë se lindi Jezusi. Por pas armëpushimit të fundit, qyteti vendosi të rikthejë traditën, simbolizuar nga ndezja e pemës së Krishtlindjeve përpara kishës historike.
“Kanë qenë dy vite të vështira heshtjeje; pa Krishtlindje, pa punë,” thotë kryebashkiaku i Bethlehem-it, Maher Canawati. “Ne jetojmë nga turizmi, dhe turizmi kishte rënë në zero.”
Ai pranon se vendimi për të rifilluar festimet ka ngjallur polemika, ndërsa vuajtjet në Gaza vazhdojnë – përfshirë edhe komunitetin e vogël të krishterë atje, shumë prej të cilëve kanë të afërm në Bethlehem. “Disa thonë se nuk është e përshtatshme, të tjerë thonë se është. Por në zemrën time ndjeva se kjo ishte gjëja e duhur, sepse Krishtlindja nuk duhet të ndalet kurrë. Ajo është drita jonë e shpresës,” shprehet ai.
Rrugët e qytetit janë ndezur me dekorime festive, ndërsa afishet e pazareve të Krishtlindjeve dhe aktivitetet për fëmijë kanë filluar të shfaqen.
Stilistja vendase e bizhuterive, Nadya Hazboun, thotë: “Këtu filloi gjithçka, ndaj nga këtu mund t’i dërgojmë botës mesazhin e vërtetë të Krishtlindjes. Dhe këtë vit, nëse Krishtlindja është paqësore, shpresoj të sjellë një mesazh të mirë për të gjithë.”
Qytetet fqinje Beit Jala dhe Beit Sahour pritet të ndezin pemët e tyre festive në ditët në vijim. Hotelet, që për dy vite ishin pothuaj bosh, tani po përjetojnë rritje rezervimesh, kryesisht nga qytetarë palestinezë të Izraelit dhe disa vizitorë të huaj.
Megjithatë, dyqanet e suvenireve ende kanë pak punë, dhe jashtë mureve krem të Kishës së Lindjes së Krishtit – që daton në shekullin IV – guidat turistike shpesh mbeten pa punë. Para luftës, zona ishte e mbushur me vizitorë.
Papunësia në Bethlehem është rritur ndjeshëm. Pas sulmeve të Hamasit në Izraelin jugor në tetor 2023, Izraeli ndaloi hyrjen e dhjetëra mijëra punëtorëve palestinezë nga Bregu Perëndimor. Ndërkohë, punonjësit e sektorit publik kanë marrë vetëm paga të pjesshme nga Autoriteti Palestinez, i cili varet nga të ardhurat tatimore të mbajtura aktualisht nga Izraeli, rreth 1.76 miliardë dollarë. Izraeli argumenton se po i mban fondet sepse Autoriteti Palestinez paguan të burgosur palestinezë të përfshirë në sulme ndaj izraelitëve, ndërsa Autoriteti Palestinez thotë se ka reformuar sistemin e mirëqenies.
Në këtë realitet të ashpër ekonomik, për shumë të krishterë palestinezë, Krishtlindja do të jetë e vështirë, pavarësisht se festimet publike janë rikthyer.
“Po përgatitemi për Krishtlindje pas një periudhe shumë të vështirë si palestinezë dhe si të krishterë,” thotë Alaa Salameh, pronar i restorantit tradicional Afteem, i cili ka humbur pjesën më të madhe të të ardhurave. Ai shton se shumë familje së fundmi nuk kanë mundur të blejnë as falafel, një ushqim i lirë e tradicional.
“Të krishterët do të përpiqen të festojnë, por sipas mundësive,” thotë ai. “Ata që duan t’i çojnë fëmijët në një festival apo teatër, thjesht nuk kanë para për këtë festë.”
Mes tensioneve që vazhdojnë në rajon, banorët e Bethlehem-it thonë se po luten për paqe dhe shpresojnë që turistët të kthehen në vendin ku besohet se nisi Krishtlindja.
(Burimi: BBC)
