Billy Steinberg, kompozitori amerikan fitues i çmimit Grammy dhe një nga penat më me ndikim të muzikës pop, është ndarë nga jeta në moshën 75-vjeçare pas një beteje me kancerin në Los Angeles, konfirmoi avokati i tij për BBC-në. Për familjen, ai ishte një “tekstshkrues vizionar, bashkëshort i përkushtuar, baba i dashur dhe një nga kompozitorët më me ndikim të epokës së tij”.
Steinberg ishte mendja krijuese pas disa prej këngëve që përcaktuan tingullin e viteve ’80 dhe ’90, por emri i tij lidhet përjetësisht me hitin e Madonnës “Like a Virgin” — kënga që jo vetëm shënoi një moment kthese në karrierën e tij, por u bë edhe singëlli i parë i këngëtares që arriti vendin e parë në SHBA.
Tekstet e Steinberg shpesh lindnin nga përjetime personale dhe më pas shndërroheshin në himne ku miliona njerëz gjenin veten. Edhe “Like a Virgin” nisi si një histori intime. “Po shkruaja për një situatë personale. Kisha qenë në një marrëdhënie të vështirë dhe arrita të çlirohesha prej saj. Takova dikë tjetёr dhe fillova të shkruaja historinë e saj,” kujtonte ai në një intervistë të vitit 2011.
Fillimisht, bashkëpunëtori i tij Tom Kelly u përpoq ta kthente këngën në një baladë, por pa sukses. Kur ndryshoi drejtimin muzikor dhe e solli në një stil të frymëzuar nga Motown dhe Michael Jackson, gjithçka mori formë. Megjithatë, rruga drejt suksesit nuk ishte e lehtë — shtëpitë diskografike e refuzuan dhe disa madje kërkuan ndryshimin e titullit, që u konsiderua provokues për kohën. Steinberg nuk pranoi. Ai besonte se po shkruante diçka që nuk ishte bërë më parë.
Kënga përfundoi në duart e drejtuesit të Warner Bros Records, Michael Ostin, i cili e kuptoi menjëherë potencialin e saj dhe mendoi se do t’i përshtatej një artisteje në ngritje: Madonna. Ironikisht, edhe vetë këngëtarja nuk u bind menjëherë, duke e quajtur demon “shumë budallaqe” dhe “si çamçakëz”. Por kënga i mbeti në mendje dhe shumë shpejt ajo ndryshoi qëndrim: “Fillova ta pëlqeja gjithnjë e më shumë dhe mendova: kjo mund të jetë shumë e mirë.”
E prodhuar nga Nile Rodgers, “Like a Virgin” qëndroi gjashtë javë në vendin e parë në SHBA në vitin 1984 dhe shiti mbi dy milionë kopje. Pavarësisht kritikave për aludimet seksuale dhe fetare, kënga u shndërrua në një simbol të pop-it modern. Rolling Stone do ta rendiste më vonë ndër këngët më të mira të të gjitha kohërave, duke theksuar se fuqia e saj qëndronte edhe në interpretimin provokues të Madonnës mbi ritmet funk.
Performanca ikonike e këngëtares në skenën e MTV Awards, me fustan nusërie dhe rripin “BOY TOY”, e vulosi statusin e saj si superyll — dhe njëkohësisht e vendosi Steinberg në elitën e autorëve të hitit.
Megjithatë, suksesi nuk e bëri jetën e tij më glamuroze. Steinberg dhe Kelly nuk e takuan Madonnën deri disa vite më vonë, në festën e 50-vjetorit të menaxherit të saj. Takimi rezultoi i shkurtër dhe disi antiklimatik. “I thashë se kisha dashur ta takoja prej kohësh. Ajo më tha ‘Tani e bëre’ dhe u largua,” kujtonte ai me humor.
Pas këtij momenti, dyshja u kthye në një fabrikë hitesh. Ata shkruan “True Colors” për Cyndi Lauper, “So Emotional” për Whitney Houston, “Eternal Flame” për The Bangles, “I Drove All Night” për Roy Orbison dhe Lauper, si edhe “I’ll Stand By You” për Pretenders. Lista e artistëve që interpretuan krijimet e tij përfshin emra si Tina Turner, Pat Benatar, Belinda Carlisle dhe Bette Midler.
Steinberg vazhdoi të ishte aktiv edhe në vitet 2000, duke bashkëpunuar në këngë si “Too Little Too Late” e JoJo dhe “Give Your Heart a Break” e Demi Lovatos. Në vitin 2011, ai u përfshi në Songwriters Hall of Fame, e cila e përshkroi si një nga autorët më të suksesshëm, këngët e të cilit janë bërë “klasike të qëndrueshme”.
Gjatë karrierës së tij katërdekadëshe, ai mori shumë vlerësime, përfshirë një Grammy për punën në albumin “Falling Into You” të Celine Dion. Por për të, thelbësore nuk ishte fama. “Jeta e Billy Steinberg ishte një dëshmi e fuqisë së një kënge të shkruar mirë — dhe e idesë se ndershmëria, kur i vihet muzikë, mund të jetojë më gjatë se të gjithë ne,” tha familja në njoftimin e ndarjes nga jeta.
Ai la pas bashkëshorten Trina, dy djem dhe dy fëmijë të adoptuar — si dhe një trashëgimi muzikore që vazhdon të dëgjohet në radio, skena dhe kujtesën kolektive të disa brezave. Sepse disa këngë nuk janë thjesht hite; ato bëhen pjesë e historisë së muzikës. Dhe Billy Steinberg ishte një nga arkitektët e saj më të mëdhenj.
(Burimi: BBC)
