Përgatituni, fansa të Bon Jovi-t — sepse blerja e biletave për koncertet e ardhshme do të ndjehet si “living on a prayer”.
Pas tre vitesh nga operacioni i zërit, Jon Bon Jovi dhe grupi i tij legjendar kanë njoftuar rikthimin e madh në skenë. Turneu botëror do të nisë në korrik 2026, me katër netë të mëdha në Madison Square Garden në Nju Jork, përpara se të vazhdojë në Londër, Dublin dhe Edinburg.
“Ky njoftim më mbush me gëzim — gëzimin që mund t’i ndajmë këto net me fansat tanë të jashtëzakonshëm dhe që grupi është sërish bashkë,” tha Jon Bon Jovi në një deklaratë. “Jam thellësisht mirënjohës që fansat dhe vëllezërit e bandës më dhanë kohën e nevojshme për t’u rikuperuar dhe për t’u përgatitur për turne. Tani jam gati dhe i emocionuar!”
Rikuperimi i këngëtarit pas ndërhyrjes kirurgjikale në kordat e zërit në vitin 2022 ishte në qendër të dokumentarit të platformës Hulu, “Thank You, Goodnight: The Bon Jovi Story”.
Në prag të turneut, grupi do të publikojë më 8 nëntor albumin “Forever (Legendary Edition)”, një version i ri i albumit të tyre të vitit 2024 Forever. Ky projekt përfshin bashkëpunime me emra të mëdhenj të muzikës si Bruce Springsteen, Lainey Wilson, Jelly Roll, Jason Isbell, Carin Leon, Joe Elliott, Robbie Williams, Avril Lavigne dhe të tjerë.
Bon Jovi e përshkroi albumin si “më shumë se një koleksion bashkëpunimesh — është një album i lindur nga domosdoshmëria. Operacioni në zë dhe rehabilitimi im ishin një udhëtim i gjatë. Në studio kisha rifituar një pjesë të zërit, por kërkesat e një turneu ishin ende përtej mundësive të mia. Atëherë vendosa t’u kërkoj disa miqve e artistëve të më ndihmonin — dhe të gjithë dhanë shpirtin e tyre,” u shpreh ai.
Datat e koncerteve të shpallura deri tani:
- 7 korrik – New York, Madison Square Garden
- 9 korrik – New York, Madison Square Garden
- 12 korrik – New York, Madison Square Garden
- 14 korrik – New York, Madison Square Garden
- 28 gusht – Edinburgh, Mbretëria e Bashkuar, Murrayfield Stadium
- 30 gusht – Dublin, Irlandë, Croke Park
- 4 shtator – Londër, Mbretëria e Bashkuar, Wembley Stadium
Fansat mund të regjistrohen në bonjovi.com për parablerjen e biletave që nis më 27 tetor, ora 10:00 ET, ndërsa shitja e përgjithshme do të hapet më 31 tetor, ora 10:00 ET.
Pas një periudhe të gjatë heshtjeje dhe shërimi, Bon Jovi kthehet më i fortë se kurrë — gati për të ndezur sërish arenat dhe për t’u dhënë fansave ndjesinë e paharrueshme që vetëm ai di ta sjellë.
