Sarah Ferguson është përballur me një tjetër goditje të rëndë, teksa vazhdojnë pasojat e skandalit të lidhjeve të saj dhe të ish-burrit Andrew me Jeffrey Epstein. Ish-Dukesha e Jorkut kishte planifikuar të publikonte librin e saj të ri, “Flora and Fern: Kindness Along The Way”, më 9 tetor, por në fillim të javës së kaluar data u shty për më 20 nëntor. Ndërsa këtë fundjavë, libri është zhdukur plotësisht nga faqja zyrtare online.
NielsonIQ Book Data konfirmoi për BBC-në se botimi është “tërhequr nga shitja” me kërkesë të botuesit. Sarah Ferguson ka mbi 50 tituj të publikuar, kryesisht libra për fëmijë.
Këto javë kanë qenë të trazuara për Sarah-n dhe Andrew-n, pas rrjedhjes së emaileve që tregojnë se të dy kanë qenë në kontakt me Epstein-in, edhe pse publikisht pretenduan se e kishin shkëputur çdo lidhje me të.
Ish-Duka i Jorkut tani njihet me emrin Andrew Mountbatten Windsor, pasi mbreti Charles i hoqi titujt mbretërorë në mënyrë sensacionale. Çifti ka marrë gjithashtu një njoftim dëbimi nga shtëpia e tyre luksoze Royal Lodge në Windsor, ku jetonin së bashku që prej vitit 2008 – një marrëveshje e rrallë mes ish-bashkëshortësh.
Andrew pritet të zhvendoset në një rezidencë të Mbretit në Sandringham, Norfolk, por ende nuk është bërë publike se ku do të jetojë Sarah. Sipas Daily Mail, ajo mund të zhvendoset në Portugali, pranë vajzës së saj, Princeshës Eugenie, dhe dhëndrit Jack Brooksbank.
Burime të brendshme thonë se Sarah ka qenë e “shqetësuar dhe e mbyllur” në rezidencën e saj të mëparshme në Windsor, ndërsa polemikat janë intensifikuar. Në shtator, u publikua një email i vitit 2011, ku ajo i referohej Epstein-it si “miku i saj i palëkundur, bujar dhe suprem”, vetëm disa javë pasi kishte dhënë një intervistë ku e quante miqësinë me të “gabim të tmerrshëm gjykimi” dhe deklaronte se nuk do kishte më asgjë me të.
Pas shpërthimit të skandalit në media, Ferguson u detyrua të tërhiqej nga shtatë organizata bamirëse me të cilat ishte e lidhur.
Ndërkohë, presioni publik ndaj Andrew-t është rritur ndjeshëm, sidomos lidhur me akuzat për marrëdhënie seksuale me Virginia Giuffre, e cila pretendon se ishte vetëm 17 vjeç dhe ishte trafikuar seksualisht nga Epstein. Andrew ka mohuar vazhdimisht çdo akuzë.
Publikimi i kujtimeve pas vdekjes së Giuffre në tetor përkoi me rrjedhjen e emaileve të reja komprometuese dhe zbulimin se Andrew nuk kishte paguar qira për 22 vjet për rezidencën e tij madhështore, duke çuar skandalin në një pikë kritike.
