Prej disa javësh, mediat rozë janë mbushur me thashetheme se Brad Pitt, ylli legjendar i Hollivudit, po përgatitet për martesën e tij të tretë. Por a është kjo dashuri e re një fillim i sinqertë apo thjesht një tjetër kapitull në serialin e pafund të historive hollywoodiane?
Burime të afërta me aktorin kanë konfirmuar për People dhe Yahoo Entertainment se Pitt aktualisht është në një lidhje të qëndrueshme me Ines de Ramon, stiliste bizhuterish 34-vjeçare, me të cilën po bashkëjeton në Los Angeles. Çifti raportohet se “janë shumë të lumtur dhe po planifikojnë të ardhmen së bashku”, por – ndryshe nga titujt sensacionalë – nuk ka ende asnjë konfirmim zyrtar për fejesë apo martesë.
Pas dy martesave të bujshme me Jennifer Aniston dhe Angelina Jolie, duket se Brad Pitt po e jeton këtë lidhje me më shumë qetësi e larg dritave të paparacëve. Një burim për People thotë se aktori “është shumë i dashuruar dhe ndjehet më i qetë se kurrë, por nuk ka plane të menjëhershme për martesë”.
Për momentin, duket se jemi më afër një dashurie të vërtetë, pa ceremoni, sesa një “show” të ri hollywoodian.
Megjithatë, kur bëhet fjalë për Brad Pitt, surprizat kurrë nuk mungojnë në skenarin e jetës së tij.
