Ish-presidenti i Brazilit, Jair Bolsonaro, u arrestua të shtunën me vendim tё Gjykatёs sё Lartë, pasi u konsiderua subjekt me rrezik të lartë arratisjeje. Bolsonaro ndodhej në arrest shtëpie ndërsa priste apelimin e dënimin për organizimin e një përpjekjeje të dështuar për grusht shteti pas zgjedhjeve të vitit 2022, ku humbi përballë Luiz Inacio Lula da Silvës.
Sipas vendimit të gjykatës, 70-vjeçari kishte tentuar të dëmtonte pajisjen e monitorimit elektronik të vendosur në kyçin e këmbës, me qëllim largimin nga rezidenca ku ishte izoluar. Në një video të publikuar nga autoritetet, Bolsonaro pranon se kishte përdorur një hekur saldimi mbi pajisjen, duke thënë se e bëri “nga kurioziteti,” ndërsa pamjet shfaqnin gjurmë të dukshme djegieje.
Gjyqtari Alexandre de Moraes e cilësoi arrestimin si masë parandaluese, duke theksuar se thirrjet për protesta të bëra nga i biri i ish-presidentit, Flavio Bolsonaro, mund të krijonin kaos dhe të ndihmonin arratisjen. Tubimi ishte planifikuar të mbahej pikërisht para kompleksit rezidencial ku Bolsonaro po qëndronte që prej gushtit.
Pas urdhrit të gjykatës, ish-presidenti u transferua në një qendër federale policore në Brasilia, ku po i nënshtrohet kontrolleve rutinё përpara sistemimit në qeli. Burime pranë hetimeve tregojnë se dhoma ku do të mbahet fillimisht është e vogël, por e pajisur me televizor, ajër të kondicionuar dhe mini-frigorifer.
Lajmi u prit me reagime sa të forta, aq edhe të kundërta. Para ndërtesës së policisë, një grup qytetarësh festuan hapur, ndërsa mbështetësit e tij e dënuan arrestimin duke e quajtur “pёrndjekje politike.” Flavio Bolsonaro deklaroi publikisht se familja ndien frikë për sigurinë e ish-presidentit dhe akuzoi gjykatën si përgjegjëse nёse “diçka i ndodh.”
Në SHBA, presidenti Donald Trump — aleat i ngushtë i Bolsonaros — e cilësoi procesin ndaj tij “gjueti shtrigash,” ndërsa tha se kishte folur me të së fundmi dhe se do të takohej me të “së shpejti.”
Kriza vjen në një moment të ndjeshëm politik për Brazilin, me elektoratin konservator të mbetur pa një figurë të fortë drejt zgjedhjeve presidenciale të vitit 2026, në të cilat presidenti aktual Lula ka paralajmëruar se do të rikandidojë.
