Komisioni Evropian ka dënuar ashpër deklaratat e prodhuara nga Grok, inteligjenca artificiale gjeneruese e platformës X, në lidhje me Holokaustin, duke i cilësuar përgjigjet e saj si “të tmerrshme” dhe një shkelje të vlerave themelore evropiane.
BE-ja ka kërkuar që platforma në pronësi të Elon Musk të ndërmarrë masa të menjëhershme për të parandaluar përsëritjen e rezultateve të tilla dhe për të kufizuar rreziqet e lidhura me përdorimin e inteligjencës artificiale.
Debati nisi nga një përgjigje e Grok në versionin e tij frëngjisht, e cila pretendonte se dhomat e gazit në Auschwitz ishin “projektuar për dezinfektim me Zyklon B kundër tifos dhe të pajisura me sisteme ventilimi për këtë qëllim, në vend të ekzekutimeve masive”. Deklarata, që bie ndesh me faktet historike dhe konsiderohet mohimi i Holokaustit, shkaktoi menjëherë reagim zyrtar nga autoritetet franceze, të cilat të mërkurën hapën një hetim ndaj platformës digjitale.
Një ditë më vonë, Komisioni Evropian publikoi një reagim të ashpër, duke njoftuar se në mars i kishte dërguar platformës X një kërkesë zyrtare për informacion mbi masat për të zbutur rreziqet e inteligjencës artificiale gjeneruese, duke përfshirë “haluҫinacionet” teknologjike, përhapjen e “deepfake”-ve dhe manipulimin automatizuar të përmbajtjeve që mund të mashtrojnë votuesit.
“Këto rezultate kundërshtojnë të drejtat dhe vlerat themelore të Evropës,” thuhet në deklaratën e Komisionit, i cili rikujton se Rregullorja e Shërbimeve Dixhitale është e qartë: “Gjuha e urrejtjes nuk ka vend në internet.” Në kuadër të kësaj rregulloreje, platforma X është e detyruar të marrë masa kundër rreziqeve që lidhen me Grok, si një kompani e klasifikuar ndër platformat e mëdha digjitale (VLOP), të cilat duhet të zbatojnë masa mbrojtëse për të kufizuar rreziqet që burojnë nga ndikimi i tyre i gjerë publik.
Marrëdhëniet mes Komisionit Evropian dhe platformës së Musk mbeten të tensionuara edhe për çështje të tjera. Në janar, Brukseli kërkoi që kompania të dorëzonte dokumentacion të brendshëm mbi sistemet e rekomandimit dhe çdo ndryshim të bërë së fundmi në to. Gjithashtu, X është urdhëruar të ruajë dokumentet e brendshme që lidhen me ndryshimet e ardhshme në funksionimin dhe pёrpunimin e algoritmeve të saj të rekomandimit gjatë periudhës nga 17 janari deri më 31 dhjetor 2025, përveç nëse hetimi i Komisionit përfundon më herët.
(Burimi: El País)
