Carla Bruni ka bërë publik përfundimin e trajtimit të saj mjekësor kundër kancerit të gjirit, duke ndarë lajmin me ndjekësit në rrjetet sociale dhe duke u bërë thirrje grave që të mos neglizhojnë kontrollet shëndetësore. Ish-Zonja e Parë e Francës njoftoi në Instagram se ka ndërprerë terapinë hormonale, të cilës iu nënshtrua për pesë vjet, pasi u diagnostikua me kancer të gjirit në fund të vitit 2019.
“Pavarësisht efekteve anësore mjaft agresive, jam mirënjohëse ndaj shkencës që shpiku terapinë hormonale, sepse ajo mbron në mënyrë efektive nga rikthimet, të cilat janë të shpeshta në vitet pas diagnozës”, shkroi Bruni, bashkëshortja e ish-presidentit francez Nicolas Sarkozy. Ajo theksoi se ky trajtim, i përdorur gjerësisht në onkologji, ka qenë vendimtar në rrugëtimin e saj drejt shërimit.
Në mesazhin e saj, Bruni u ndal edhe te rëndësia e parandalimit, duke i ftuar gratë të kryejnë kontrolle të rregullta. “Dua t’u them edhe një herë të gjitha grave që po e lexojnë këtë postim të mos hezitojnë të bëjnë kontrolle çdo vit, nëse është e mundur, sepse jeta ndonjëherë sjell surpriza të pakëndshme”, shkroi ajo. Artistja tregoi për herë të parë në fillim të tetorit 2023 se ishte diagnostikuar me kancer të gjirit katër vite më parë, një rrëfim që u prit me mbështetje të gjerë nga publiku.
Në fund, Carla Bruni shprehu mirënjohje të veçantë për ekipin mjekësor që e shoqëroi gjatë kësaj periudhe të vështirë, duke vlerësuar profesionalizmin dhe humanizmin e treguar gjatë gjithë trajtimit.
(Burimi: TGCOM)
