Deklarata e Mbretit Charles ishte e shpejtë, e shkurtër dhe e prerë. Autoritetet kanë “mbështetjen dhe bashkëpunimin tonë të plotë dhe me gjithë zemër”, thuhej në reagimin zyrtar, duke theksuar se “ligji duhet të marrë rrugën e vet”. Vetëm pak orë më parë, vëllai i tij ishte arrestuar në rezidencën e tij në Sandringham, prona private e monarkut në veri të Londrës. Edhe për një familje që ka kaluar kriza të shumta, zhvillimi ishte tronditës.
Deklarata, me pak më shumë se 100 fjalë dhe e lëshuar në emër personal të Mbretit, nuk linte vend për keqkuptime. “Unë dhe familja ime do të vazhdojmë të kryejmë detyrën dhe shërbimin tonë ndaj jush të gjithëve”, përfundonte ajo – një mesazh i qartë se detyra ndaj vendit vendoset mbi çdo ndjenjë personale ndaj vëllait më të vogël. Sipas burimeve, Princi William dhe Princesha Catherine e Uellsit e mbështetën deklaratën, duke sinjalizuar një qëndrim të unifikuar të anëtarëve më të lartë të familjes mbretërore.
Qasja e Charles ndaj akuzave kundër Andrew ka qenë dukshëm ndryshe nga ajo e nënës së tij të ndjerë, Mbretëreshës Elizabeth II. Thuhet se Andrew ishte djali i saj i preferuar dhe kritikët kanë argumentuar se ajo nuk veproi mjaftueshëm shpejt për ta mbajtur përgjegjës për pasojat e miqësisë së tij me financierin e dënuar për krime seksuale, Jeffrey Epstein. U vu në pikëpyetje fakti që ai përdori Pallatin Buckingham për intervistën e tij katastrofike në BBC në vitin 2019, ku u përpoq të mohonte akuzat. Po ashtu, u kritikua raportimi se Mbretëresha i dha miliona për të zgjidhur padinë civile për sulm seksual të ngritur nga Virginia Giuffre në vitin 2021. Pavarësisht pagesës, Andrew i mohoi vazhdimisht akuzat dhe tha se nuk e kujtonte ta kishte takuar ndonjëherë Giuffre, megjithëse ekziston një fotografi e tyre së bashku.
Në kontrast, që nga ngjitja në fron në vitin 2022, Charles ka mbajtur një qëndrim më të prerë. Ai thuhet se kishte shqyrtuar prej kohësh mundësinë e largimit të Andrew nga rezidenca e tij në Windsor, përpara se t’i hiqte statusin e “princit” dhe ta dëbonte nga prona mbretërore në tetor. Në deklaratën e së enjtes, Charles nuk e përshkroi në mënyrë të drejtpërdrejtë Andrew si vëllain e tij.
Sipas një burimi mbretëror për CNN, as Mbreti dhe as pallati nuk ishin paralajmëruar paraprakisht për arrestimin. Arrestimi, nën dyshimin për shkelje gjatё ushtrimit tё detyrës publike, nuk përbën provë faji, por përbën një tjetër moment të jashtëzakonshëm në rënien shumëvjeçare të Andrew nga pushteti. Policia tha se ai është liruar, por mbetet nën hetim dhe nuk janë ngritur akuza.
Ish-princi nuk ka reaguar publikisht ndaj akuzave të fundit, të cilat dolën pasi Departamenti Amerikan i Drejtësisë publikoi miliona dokumente të lidhura me Epstein. Mountbatten-Windsor ka mohuar vazhdimisht çdo shkelje dhe ka deklaruar se nuk ka qenë kurrë dëshmitar apo i dyshuar për sjelljet për të cilat akuzohej Epstein. Ai nuk ka komentuar as për akuzat e fundit për shkelje të detyrës publike.
Ngjarjet e së enjtes nisën me mbërritjen herët në mëngjes të automjeteve policore pa shenja dalluese në banesën e përkohshme të Andrew në Sandringham, pikërisht në ditëlindjen e tij të 66-të. Zhvillimi e vendos familjen mbretërore përballë një prej krizave më të mëdha në dekada. Edhe pse tronditës, ai nuk ishte krejtësisht i papritur, duke pasur parasysh peshën e akuzave që kanë hedhur hije mbi familjen prej vitesh.
Pallati kishte deklaruar hapur javën e kaluar se Charles do të mbështeste autoritetet në hetimet e tyre. Nëse kërkohet, kjo mund të nënkuptojë akses të policisë në komunikime të brendshme mes Andrew dhe të tjerëve.
Charles dhe Andrew nuk mendohet të kenë qenë shumë të afërt në fëmijëri, për shkak të diferencës prej 11 vitesh në moshë. Mbreti ka qenë tradicionalisht më i lidhur me motrën e tij, Princeshën Anne. Sidoqoftë, në vitet 1980, kur Charles ishte i martuar me Dianën dhe Andrew me Sarah Ferguson, familjet e tyre ishin të afërta dhe gratë njiheshin si shoqe të mira.
Historiania mbretërore Kate Williams tha për CNN se familja tani ka “një problem të madh në duar dhe po e ndan veten nga Andrew”. Ajo paralajmëroi se publiku mund të kërkojë më shumë përgjegjësi në të ardhmen. “Pyetja do të bëhet gjithnjë e më shumë: ‘Çfarë dinte Charles?’ Dhe mendoj se njerëzit do të fillojnë të thonë: ‘Çfarë dinte William?’”, tha ajo, duke e cilësuar situatën si sfidën më të madhe për familjen mbretërore që nga vdekja e Dianës.
Komentatori mbretëror Sandro Monetti shtoi se “çështja Andrew ka qenë dhe do të jetë për të përcaktuar të gjithë mbretërimin e Mbretit Charles”. Ai theksoi se Andrew mbetet i teti në radhë për fronin, duke sugjeruar se mund të shtohen thirrjet në Parlament për ndryshime në këtë drejtim. “Veprimet për të cilat ai akuzohet e vënë në rrezik të gjithë të ardhmen e monarkisë”, tha Monetti.
(Burimi: CNN)
