Në një zonë të qetë malore në lindje të Tennessee-s, larg syve të publikut, është ngritur një kompleks prej 124 hektarësh që sipas CNN shërben si bazë për grupin supremacist të bardhë Patriot Front, një organizatë e cilësuar si grup urrejtjeje nga Qendra Ligjore për Varfërinë Jugore (SPLC).
Banorët lokalë tregojnë se ndihen të frikësuar nga prania e grupit, i cili ka ndërtuar disa struktura në pronë, përfshirë një palestër të stilit “kasolle”, ku bёhet stёrvitje nё stilin e “pёrleshjes”. Sipas CNN, pamjet me dron dhe imazhet satelitore tregojnë se në pronë janë ndërtuar të paktën pesë godina që nga viti 2021.
“Jam e frikësuar t’i lë fëmijët të shkojnë në pyll, ashtu siç bëja unë dikur,” tha për CNN një nënë e zonës, e cila foli në kushte anonimiteti për arsye sigurie. “Nuk e di çfarë mund të ndodhë nëse shkojnë nga ajo anë.”
Patriot Front është një nga grupet nacionaliste të bardha më aktive në SHBA, sipas ekspertëve të ekstremizmit. Vetëm vitin e kaluar, Tennessee ishte ndër shtetet me numrin më të lartë të aktiviteteve supremaciste, pas Teksasit, Alabamës dhe Pensilvanisë, sipas të dhënave të Anti-Defamation League (ADL).
Grupi udhëhiqet nga Thomas Rousseau, 27 vjeç, i cili promovon ideologjinë se vetëm të bardhët me origjinë evropiane mund të quhen amerikanë. Manifesti i organizatës mbështet një shoqëri ultrakonservatore, kundërshton përfshirjen e grave në politikë dhe bën thirrje për dëbime masive.
Edhe pse Patriot Front e përshkruan veten si “jo i dhunshëm”, grupi është shpallur fajtor këtë vit në një proces civil për një sulm të dhunshëm ndaj një muzikanti me ngjyrë gjatë një marshimi në Boston në vitin 2022. Viktima, Charles Murrell III, fitoi 2.75 milionë dollarë dëmshpërblim, por asnjë nga anëtarët e grupit nuk u paraqit në gjykatë.
Ekspertët paralajmërojnë se krijimi i bazave të izoluara për grupe ekstremiste përbën një rrezik serioz. “Kur një grup ekstremist krijon komunitete të mbyllura dhe private, rreziku i radikalizimit dhe dhunës rritet ndjeshëm,” tha për CNN Daryl Johnson, ish-analist i Departamentit amerikan të Sigurisë Kombëtare.
Prona menaxhohet nga Ian Elliott, një figurë kyçe e Patriot Front, i cili e ka quajtur zonën “tokë fisnore” dhe ka folur hapur për ndërtimin e një komuniteti të vetëqëndrueshëm, të frymëzuar nga besime pagane nordike. Elliott dhe drejtuesit e grupit nuk iu përgjigjën kërkesave të CNN për koment.
Prania e grupit ka shkaktuar përçarje edhe në komunitetet përreth. Një shkollë arti marcial në një qytet fqinj u detyrua pothuajse të mbyllej pasi u zbulua se disa nga anëtarët e saj ishin pjesë e Patriot Front, duke shkaktuar reagime të forta publike.
Sipas CNN, e ardhmja e kompleksit mbetet e paqartë pas vdekjes së një prej figurave neonaziste të lidhura me pronën, por banorët e zonës shprehen se shpresa e tyre kryesore është largimi i grupit.
“Kam një vajzë të vogël,” tha një banor. “Dua vetëm të di pse urrejtja e tyre duhet të vijë këtu.”
(Burimi: CNN)
