Departamenti i Drejtësisë i SHBA-së ka njoftuar se ka zbuluar mbi një milion dokumente shtesë që mund të lidhen me çështjen e Jeffrey Epstein, duke shtuar se do t’i duhen edhe disa javë për t’i shqyrtuar dhe për t’i bërë publike.
Sipas një deklarate zyrtare, dokumentet e reja janë identifikuar nga Zyra e Prokurorit të SHBA-së për Distriktin Jugor të Nju Jorkut dhe nga FBI, dhe janë dorëzuar për shqyrtim në kuadër të ligjit të ri për transparencën e dosjeve Epstein, i miratuar nga Kongresi muajin e kaluar.
Autoritetet amerikane sqarojnë se ekipet ligjore po punojnë pa ndërprerje për të analizuar materialet dhe për të bërë redaktimet e nevojshme ligjore, me qëllim mbrojtjen e viktimave dhe respektimin e urdhrave gjyqësorë. Për shkak të volumit të madh të dokumenteve, procesi pritet të zgjasë edhe disa javë.
Ende nuk është e qartë se si janë zbuluar dokumentet e reja dhe çfarë përmbajnë konkretisht, por njoftimi vjen në një moment kur administrata amerikane është nën presion të fortë politik dhe publik për mënyrën e publikimit të dosjeve Epstein.
Në javët e fundit, Departamenti i Drejtësisë ka publikuar dokumente në mënyrë të fragmentuar, çka ka shkaktuar kritika të forta nga ligjvënës të të dyja partive dhe nga të mbijetuar të abuzimeve të Epsteinit. Disa i kanë cilësuar redaktimet si tepër mbrojtëse për persona me pushtet, ndërsa të tjerë kanë denoncuar publikimin e materialeve ku të dhënat e viktimave nuk janë mbrojtur mjaftueshëm.
Dokumentet e publikuara deri tani kanë përfshirë edhe referenca për figura të njohura politike, përfshirë presidentin Donald Trump dhe ish-presidentin Bill Clinton, megjithëse asnjëri prej tyre nuk është akuzuar ndonjëherë nga autoritetet për përfshirje në krimet e Epstein. Të dy kanë mohuar çdo keqbërje.
Çështja Epstein vazhdon të mbetet një nga plagët më të rënda të elitave politike dhe financiare amerikane, duke ngritur pyetje të forta për abuzimin me pushtetin, mungesën e llogaridhënies dhe drejtësinë për viktimat. Zbulimi i mbi një milion dokumenteve të tjera rrezikon ta mbajë këtë histori të hapur edhe për një kohë të gjatë, me pasoja politike dhe ligjore ende të paparashikueshme.
