Një studente e vitit të parë në kolegj në Shtetet e Bashkuara u deportua me urgjencë drejt Hondurasit, duke sfiduar një urdhër të drejtpërdrejtë të gjykatës federale që kërkonte ndalimin e largimit të saj. Ngjarja ka shkaktuar reagime të forta dhe po shihet si një sinjal se politikat e reja të administratës Trump po zbatohen me “dorë të hekurt”, veçanërisht ndaj personave me dokumentacion të pasigurt – përfshirë studentët që kërkojnë “ëndrrën amerikane”.
Any Lucia Lopez Belloza, 19 vjeç, studente e Kolegjit Babson, po udhëtonte nga Bostoni drejt Teksasit më 20 nëntor për t’i bërë surprizë familjes për Ditën e Falënderimeve. Ajo kishte kaluar të gjitha kontrollet e sigurisë në Aeroportin Ndërkombëtar Boston-Logan kur u tërhoq mënjanë, me arsyetimin se kishte “një problem me biletën”.
Sipas avokatit të saj, Todd Pomerleau, Lopez Belloza u ndalua nga zyrtarët federalë të emigracionit (ICE) dhe brenda 48 orëve u dërgua në Teksas e më pas u deportua në Honduras – vend që e kishte lënë që 7 vjeçe. “Ajo është absolutisht e shkatërruar,” tha avokati. “Ëndrra e saj për të përfunduar kolegjin sapo është rrënuar.”
Autoritetet federale thonë se studentja kishte një urdhër deportimi të lëshuar më 2015 nga një gjyqtar emigracioni, por avokati thekson se nuk ka pasur asnjë njoftim dhe dokumenti i vetëm zyrtar që ai ka gjetur tregon se çështja është mbyllur në vitin 2017.
Një ditë pas arrestimit të saj, një gjykatës federal lëshoi një urdhër urgjent që ndalonte deportimin për të paktën 72 orë. Megjithatë, studentja ishte tashmë jashtë vendit. ICE nuk ka komentuar ende për shkeljen e urdhrit gjyqësor dhe as Kolegji Babson.
Aktualisht Lopez Belloza ndodhet në Honduras, në shtëpinë e gjyshërve të saj, ndërsa familja e saj në SHBA është e tronditur. E kontaktuar nga The Boston Globe, ajo ka thënë se mezi priste t’i tregonte familjes për semestrin e saj të parë në kolegj, ku studionte biznes. “Kjo ishte ëndrra ime,” tha ajo. “Po humbas gjithçka.”
