Të paktën shtatë persona kanë humbur jetën dhe dhjetëra të tjerë rezultojnë të zhdukur pasi një anije që transportonte rreth 200 emigrantë, të cilët po përpiqeshin të arrinin në Evropë, u përmbys pranë brigjeve të Gambias. Autoritetet bëjnë të ditur se ngjarja ndodhi të mërkurën rreth mesnatës, pranë fshatit Jinack në Rajonin e Bregut të Veriut, ndërsa më pas varka u gjet e bllokuar në një breg ranor.
Deri më tani janë shpëtuar 96 persona, ndërsa operacionet e kërkim-shpëtimit po vazhdojnë për pasagjerë të tjerë që ndodheshin në anijen e mbytur, e cila ishte nisur drejt Ishujt Kanarie të Spanjës. Sipas autoriteteve, 10 nga të mbijetuarit janë në gjendje kritike dhe po marrin trajtim mjekësor urgjent, ndërsa identiteti i viktimave ende po verifikohet, pasi disa prej tyre nuk janë shtetas gambianë.
Pas aksidentit, Marina e Gambias nisi një operacion të gjerë kërkim-shpëtimi, duke angazhuar disa anije detare dhe një varkë peshkimi që iu bashkua përpjekjeve. Rruga e rrezikshme përmes Oqeanit Atlantik po përdoret gjithnjë e më shpesh nga emigrantët afrikanë që synojnë të arrijnë në Evropë, pasi masat për frenimin e migracionit të parregullt në Afrikën e Veriut kanë shtyrë shumë prej tyre drejt këtij kalimi më të gjatë dhe më të rrezikshëm.
Vetëm gjatë vitit 2024, rreth 47 mijë persona mbërritën në Ishujt Kanarie, ndërsa sipas vlerësimeve të organizatave humanitare, më shumë se 9 mijë emigrantë kanë humbur jetën vitet e fundit duke tentuar këtë udhëtim të rrezikshëm përmes Atlantikut.
(Burimi: CNN)
