Me rënien e temperaturave, infeksionet respiratore janë rikthyer fuqishëm edhe këtë dimër në Shqipëri. Qendrat shëndetësore po raportojnë rritje të ndjeshme të rasteve me grip, viroza të forta, bronkite dhe infeksione të zgjatura që po qarkullojnë masivisht në çerdhe, shkolla dhe ambiente pune. Në shumë familje tashmë pothuajse të gjithë kanë kaluar nga një raund virozash, ndërsa mjekët paralajmërojnë se sezoni i këtij viti mund të jetë më i rëndë për shkak të kombinimit të gripit, virozave sezonale dhe rasteve here pas here të Covid-19.
Dimri është periudha ideale për përhapjen e viruseve: njerëzit qëndrojnë më shumë në ambiente të mbyllura dhe pak të ajrosura, përdorin shpesh ngrohje që e than ajrin dhe i lejon viruset të qarkullojnë më gjatë, ndërsa kontaktet rriten nga aktivitetet shoqërore dhe festat. Edhe udhëtimet brenda dhe jashtë vendit shtojnë mundësinë e përhapjes së infeksioneve, pasi njerëz nga vende të ndryshme vijnë në kontakt me njëri-tjetrin.
Megjithëse nuk ka mënyrë të garantuar për të shmangur virozat, disa masa mund të ulin dukshëm rrezikun. Mjekët theksojnë se vaksinimi kundër gripit mbetet mburoja kryesore për të moshuarit, fëmijët, gratë shtatzëna dhe personat me sëmundje kronike.
Një tjetër masë e thjeshtë, por shpesh e anashkaluar, është larja e duarve me sapun për të paktën 20 sekonda, sidomos pas përdorimit të transportit publik, apo vizitave në ambiente të mbipopulluara. Në periudha kur infeksionet qarkullojnë me intensitet të lartë, mbajtja e një maske cilësore në ambiente shumë të mbyllura ose të mbushura me njerëz mund të shtojë një shtresë mbrojtjeje për të moshuarit, të sëmurët kronikë apo personat me imunitet të dobët.
Ajrosja e ambienteve është e domosdoshme, edhe kur është ftohtë. Mjekët këshillojnë të hapen dritaret për disa minuta disa herë në ditë, gjë që ul dendësinë e viruseve në ajër. Edhe evitimi i grumbullimeve të panevojshme kur ka shpërthime virozash në komunitet mund të ndihmojë. Por masa më humane dhe më efektive për të mbrojtur të tjerët është kjo: nëse jeni të sëmurë, qëndroni në shtëpi dhe mos i ekspozoni të afërmit apo kolegët, sidomos fëmijët dhe të moshuarit.
Nëse simptomat shfaqen, shumica e infeksioneve të dimrit menaxhohen me pushim, hidratim dhe ilaçe kundër etheve e dhimbjeve. Testimi për grip apo Covid është i dobishëm për personat që mund të përfitojnë nga trajtimi antiviral. Mjekët këshillojnë të kërkohet ndihmë profesionale nëse simptomat zgjasin më shumë se një javë, përkeqësohen pas një përmirësimi të shkurtër, ose shoqërohen me vështirësi në frymëmarrje, dhimbje gjoksi, temperaturë që nuk ulet me ilaçe, dhimbje të forta të sinuseve apo shenja dehidratimi. Foshnjat dhe fëmijët e vegjël duhet të kontrollohen më herët, sidomos nëse kanë temperaturё të lartё ose mungesё oreksi.
Edhe pse ky dimër pritet të sjellë një valë të fortë infeksionesh, një kombinim i kujdesit të thjeshtë ditor, vaksinimit dhe menaxhimit të duhur të simptomave mund të bëjë diferencën për shëndetin e familjes. Në fund të fundit, mbrojtja nga viruset nuk është çështje fati — është çështje zakonesh të vogla që sjellin rezultat të madh.
