Burime të ndryshme, ende të pakonfirmuara zyrtarisht, raportojnë se Sekretari i Përgjithshëm i Kryeministrisë, Engjëll Agaçi, është larguar nga detyra që mbante prej 13 vitesh pranë kryeministrit Edi Rama. Sipas të njëjtave burime, largimi ka ardhur përmes dorëheqjes, megjithatë arsyet nuk janë bërë publike.
Raportimet e lidhin këtë zhvillim me marrjen në pyetje për disa orë të Agaçit gjatë ditës së sotme në Prokurorinë e Posaçme (SPAK), në kuadër të hetimeve për çështjen e inceneratorëve. Nuk ka ende një reagim zyrtar që të konfirmojë nëse këto dy ngjarje kanë lidhje direkte, por koha e tyre e afërt ka shtuar pikëpyetjet mbi natyrën e vёrtetё të “dorëheqjes”.
Në vend të Agaçit pritet të emërohet Elsonida Rama, e cila ka qёnё vartёsja e bindur e Agaҫit, aq sa ai e promovoi duke e vёnё “roje” tё projektakteve nё Ministrinё e Drejtёsisё, si Drejtoreshё tё Pёrgjithshme tё Kodifikimit. E me sa duket, tani e rikthen tё ruajё arkivёn e 13 viteve qё ka lёnё pas nё Kryeministri.
Ndryshime janë bërë edhe në strukturën e kabinetit të Kryeministrit. Vilma Guri është caktuar shefe e kabinetit, duke plotёsuar vendin bosh qё la muaj mё parё Vali Bizhga.
Këto lëvizje vijnë në një moment të ndjeshëm për qeverinë dhe prekin drejtpërdrejt bërthamën administrative të Kryeministrisë. Largimi i një prej bashkëpunëtorëve më të afërt të Ramës shihet si një zhvillim me peshë politike, që shton perceptimin se presioni i hetimeve po reflektohet edhe në nivelet më të larta të administratës shtetërore.
