“Djalli vishet me Prada 2”, vazhdimi i filmit me Meryl Streep, Anne Hathaway, Emily Blunt dhe Stanley Tucci, që flet për redaktoren e egër të një reviste mode që ngjan shumë me Anna Wintour, do të dalë në kinematë italiane më 29 prill 2026. Traileri i parë është publikuar. Nën tingujt e këngës “Vogue” të Madonnës, shohim Andy Sachs (Anne Hathaway) duke hyrë në ashensor menjëherë pas Miranda Priestley (Meryl Streep). Priestley i drejtohet Andit me një koment therrës: “Të mori shumë kohë.” Një deklaratë që kujton natyrën autoritare të redaktores, por në të njëjtën kohë i jep një shenjë periudhës së gjatë 19-vjeçare që u desh për të krijuar këtë vazhdim të shumëpritur.
Sheshxhirimi i “Djalli vishet me Prada 2”
Pak dihet për pёrmbajtjen e episodit të ri të 20th Century Studios, pasi studioja e ka mbajtur gjithçka të fshehtë për muaj të tërë. Megjithatë, disa imazhe zbulojnë detaje delikate, të tilla si një qilim blu në një skenë dhe shkëndija të vazhdueshme të fotografëve në një tjetër. Ajo që është e sigurt është se, në pjesën e dytë të sagës të drejtuar nga David Frankel, Miranda Priestley kthehet në krye të revistës së njohur të modës Runway, e cila këtë herë duhet të përballet me vështirësitë e shkaktuara nga kriza në tregun e shtypit.
Kasti
Vazhdimi i filmit i është besuar përsëri regjisorit David Frankel dhe skenaristes Aline Brosh McKenna. Filmi i ri sjell fytyra të reja në ekran, së bashku me ato që janë tashmë të njohura: në kastin përfshihen Kenneth Branagh, Simone Ashley, Justin Theroux, Lucy Liu, Patrick Brammall, Caleb Hearon, Helen J. Shen, Pauline Chalamet, B.J. Novak dhe Conrad Ricamora. Duket se ka vend edhe për Lady Gaga-n, e cila u pa gjatë xhirimeve.
Përvoja e Streep në sheshxhirim
Gjatë viteve, Meryl Streep ka folur për përvojën e saj në shesh-xhirim, duke e përshkruar atë si një “traumë” pjesërisht. Për të luajtur Mirandën, ylli i Hollivudit përdori të ashtuquajturën “metodë”, të zhvilluar nga Lee Strasberg, Stella Adler dhe Sanford Meisner në vitet 1930. “Ishte e tmerrshme! Isha e mjerë në dhomë time. Mund t’i dëgjoja të gjithë duke qeshur dhe duke kaluar shumë mire”, rrëfeu aktorja. “Unë, nga ana tjetër, isha shumë e dëshpëruar! Dhe i thashë vetes: Ky është çmimi që paguan për të qenë shefe! Kjo është hera e fundit që do ta provoj këtë teknikë”, theksoi ajo.
(Burimi: TGCOM)
