Pas më shumë se katër dekadash, vihet drejtёsi për Sarah Geer, 13-vjeçaren e vrarë në Kaliforni në vitin 1982. Zbulimi i ADN-së në një bisht cigareje të hedhur ka çuar në dënimin e autorit të krimit, duke mbyllur një nga çështjet më të vjetra të pazgjidhura në qarkun Sonoma.
Sarah ishte parë për herë të fundit mbrëmjen e 23 majit 1982, teksa largohej nga shtëpia e një shoqeje në Cloverdale. Të nesërmen në mëngjes, trupi i saj u gjet nga një zjarrfikës që po kthehej në shtëpi pas turnit. Ajo ishte tërhequr në një zonë të izoluar pranë një godine banimi, ku u dhunua dhe u mbyt. Vdekja u klasifikua si vrasje, por për shkak të kufizimeve të shkencës forenzike të asaj kohe, hetimet nuk çuan në identifikimin e një të dyshuari dhe dosja mbeti e hapur për dekada.
Një zhvillim i parë ndodhi në vitin 2003, kur hetuesit arritën të krijonin një profil ADN-je nga mostra biologjike e mbledhur në vendngjarje. Megjithatë, profili nuk përputhej me asnjë të dhënë në bazat ekzistuese të ADN-së të autoriteteve.
Rasti u rihap në vitin 2021, me përfshirjen e Byrosë Federale të Hetimit (FBI) dhe përdorimin e metodës së genealogjisë gjenetike, e cila kombinon analizën e ADN-së me kërkimin në pemët familjare. Hetuesit arritën në përfundimin se ADN-ja i përkiste njërit prej katër vëllezërve të familjes Unick.
Agjentët vendosën nën vëzhgim James Unick dhe arritën të siguronin një bisht cigareje që ai kishte hedhur. Analiza konfirmoi përputhjen me profilin e krijuar vite më parë, si dhe me gjurmë të tjera të gjetura në rrobat e viktimës.
James Unick, sot 64 vjeç, u arrestua në korrik 2024 në shtëpinë e tij në Willows, Kaliforni. Gjatë gjyqit njëmujor ai fillimisht mohoi çdo njohje me Sarah, më pas pretendoi se kishin pasur marrëdhënie me pëlqim dhe se ajo ishte sulmuar më vonë nga dikush tjetër. Juria i hodhi poshtë këto pretendime dhe, pas dy orësh diskutimi, e shpalli fajtor për vrasje më 13 shkurt 2026 – në ditën që do të ishte 57-vjetori i lindjes së Sarah-s.
Si pasojë e vendimit dhe rrethanave rënduese të lidhura me sulmin seksual gjatë kryerjes së vrasjes, Unick do të dënohet me burgim të përjetshëm pa të drejtë lirimi me kusht.
Prokurorja e qarkut, Carla Rodriguez, e cilësoi vendimin si një dëshmi të këmbënguljes së hetuesve që nuk hoqën dorë kurrë nga kërkimi i autorit. Ndërsa shefi i policisë së Cloverdale, Chris Parker, e quajti vendimin një fitore të hidhur, duke theksuar se asgjë nuk mund ta zhbëjë dhimbjen e familjes, por drejtёsia përfundimisht u vendos.
(Burimi: Mirror, CNN)
