Tregjet globale e nisën kёtё javë me luhatje të forta, ndërsa dollari amerikan ra në nivelin më të ulët të tre viteve të fundit, ari kapërceu për herë të parë pragun e 5 mijë dollarëve për onz dhe çmimet e energjisë u rritёn për shkak të valës së acarit në Shtetet e Bashkuara.
Sipas të dhënave të Bloomberg, indeksi i dollarit ra me 0.4%, ndërsa jeni japonez u forcua me 1%, mes spekulimeve se SHBA dhe Japonia mund të koordinojnë ndërhyrje për të stabilizuar kursin e këmbimit. Në të njëjtën kohë, ari – tradicionalisht aset strehë në periudha pasigurie – arriti nivel rekord mbi 5,000 dollarë për onz.
Në tregjet energjetike, gazi natyror në SHBA u rrit me afro 30%, pasi stuhitë dimërore dhe temperaturat ekstreme kanë nxjerrë jashtë funksionit rreth 12% të prodhimit amerikan. Rrjetet elektrike janë nën presion nga Teksasi deri në Maine, duke rritur frikën për furnizim të kufizuar energjie në ditët në vijim.
Ndërkohë, tregjet e aksioneve mbetën relativisht të qëndrueshme. Indeksi S&P 500 u rrit me 0.5%, duke zgjatur trendin pozitiv të janarit, në pritje të publikimit të rezultateve financiare të gjigantëve teknologjikë. Investitorët kërkojnë sinjale konkrete se miliardat e investuara në inteligjencën artificiale po kthehen në fitime reale.
Sezoni i bilanceve financiare pritet të intensifikohet këtë javë, me kompani që përfaqësojnë rreth një të tretën e kapitalizimit të S&P 500 që raportojnë rezultatet e tyre. Analistët e JPMorgan vërejnë se rreth gjysma e kompanive që kanë dhënë parashikime për vitin 2026 kanë tejkaluar pritshmëritë e tregut — sinjal i zgjerimit të rritjes edhe jashtë sektorit teknologjik.
Në frontin monetar, Rezerva Federale pritet të mbajë normat e interesit të pandryshuara, pas tre uljeve në fund të vitit 2025. Kryetari, Jerome Powell, pritet të theksojë se politika monetare është aktualisht “e pozicionuar mirë”, pa dhënë sinjale të qarta për ulje të tjera të shpejta.
Megjithatë, vëmendja e tregjeve mbetet edhe te zhvillimet politike. Presidenti Donald Trump ka paralajmëruar se së shpejti do të shpallë emrin e pasuesit të Powell, çka ka shtuar pasigurinë mbi pavarësinë e ardhshme të bankës qendrore amerikane.
Analistët theksojnë se fillimi i vitit 2026 po karakterizohet nga një zhvendosje e kapitalit nga gjigantët e teknologjisë drejt sektorëve më të lidhur me ekonominë reale — industri, konsum dhe shëndetësi — ndërsa investitorët kërkojnë stabilitet në një mjedis ku monedhat, energjia dhe metalet e çmuara po lëvizin me ritme të forta.
Si pёrfundim, dollari dobësohet, ari forcohet, energjia shtrenjtohet. Dhe tregjet po hyjnë në një fazë të re ku pasiguria monetare dhe politike po bëhet po aq e rëndësishme sa performanca e kompanive.
(Burimi: Bloomberg)
