Një projektligj i propozuar nga Ministria e Financave i hap rrugën praktikisht një prej aministive më të mëdha fiskale në historinë e Shqipërisë. Drafti, i hedhur për konsultim me grupet e interesit fal totalisht detyrimet tatimore të krijuara përpara dhjetorit 2014, duke përfshirë detyrimin, gjobat dhe kamatvonesat, përveç kontributeve të sigurimeve.
Përveç kësaj, projektligji bën falje të pjeshme, deri në 50 për qind, edhe për detyrimet e krijuara nga 1 janari 2015 deri në 31 dhjetor të vitit 2019.
Bëhet fjalë për faljen potencialisht të rreth 1 miliardë eurove detyrime tatimore për bizneset që nuk janë treguar korrekte me pagesën e taksave.
Më konkretisht, sipas të dhënave të ministrisë së Financave, detyrimet e krijuara para dhjetorit 2014, janë plot 55 miliardë lekë ose 552 milionë euro. Brenda kësaj shume, 45 milionë euro janë detyrime për kontributet e sigurimeve shoqërore dhe shëndetësore, të cilat nuk falen. Pra mbi 500 milionë euro detyrime të para dhjetorit 2014, falen automatikisht.
Ndërkohë për detyrimet e krijuara nga 1 janari 2015 deri në 31 dhjetor 2019 bëhet falje e të gjithë gjobave dhe interesave deri në 50 për qind të detyrimit për bizneset që pranojnë të hyjnë në marrëveshje me Tatimet.
“Për detyrimet tatimore, me përjashtim të kontributeve të sigurimeve shoqërore dhe shëndetësore, që i përkasin periudhave tatimore nga 1 janar 2015 deri në 31 dhjetor 2019:
a) Shuhet 50% e detyrimit tatimor nëse pjesa e mbetur 50% e tatimi/taksës/tarifës paguhet e gjitha njëherësh brenda datës 30.6.2026.
b) Shuhet 25% e detyrimit tatimor nëse pjesa e mbetur 75% e tatimit/taksës/tarifës, paguhet me këste mujore të barabarta brenda datës 31.12.2026.
Në të dy rastet, sipas shkronjave “a” dhe “b” të kësaj pike, gjobat dhe kamatëvonesat për periudhat përkatëse fshihen plotësisht,” thuhet në projektligj.
Sipas të dhënave zyrtare, aktualisht bizneset kanë 98 miliardë lekë ose 980 milion euro detyrime të papaguara në tatime dhe dogana, të cilat janë krijuar nga data 1 janar 2015 deri në 31 dhjetor 2019, nga të cilat 91 milionë euro janë kontribute që nuk falen.
Sikur të gjitha këto biznese që nuk janë treguar korrekte në pagesën e taksave, të pranojnë të hyjnë në marrëveshje me autoritetet fiskale, atëherë i bie që të përfitojnë potencialisht deri në 450 milionë euro falje taksash.
Nëse këtyre u shtohen dhe 500 milionë eurot e para vitit 2014, të cilat falen automatikisht, atëherë shuma potenciale e aministisë mund të shkojë deri në 1 miliardë euro ose rreth 4 për qind e Prodhimit të Përgjithshëm Bruto.
Kjo është një nga aministitë më të mëdha fiskale të ndërmarra ndonjëherë në historinë e Shqipërisë, në vlerë absolutisht më e madhja.
(Marrё nga: KAPITALI, https://www.kapitali.al/lajme-nga-vendi/qeveria-ben-aministi-te-gjere-fiskale-deri-ne-12-miliarde-euro-t-i35963)
