Universitetet elitare të teknologjisë në Indi, të njohura si Indian Institute of Technology (IIT), prej dekadash konsiderohen simbol i suksesit akademik dhe karrierës së garantuar. Por pas reputacionit të tyre prestigjioz, po del në pah një realitet shqetësues: një numër në rritje i vetëvrasjeve të studentëve.
Sipas të dhënave të përmbledhura nga organizata mbështetëse për studentët, të paktën 160 studentë kanë humbur jetën në dy dekadat e fundit në IIT, ndërsa 69 prej tyre janë regjistruar vetëm në pesë vitet e fundit.
Një nga rastet që ka tronditur opinionin publik është ai i Varad Nerkar, një student 26-vjeçar i programit master në IIT-Delhi, i cili i dha fund jetës në vitin 2024. Babai i tij, Sanjay Nerkar, kujton se djali e kishte ëndërruar prej fëmijërisë pranimin në IIT. Ai telefononte çdo mbrëmje në shtëpi për të dëgjuar zërin e të atit, por kjo rutinë u ndërpre tragjikisht kur Varad u gjet i vdekur në konvikt.
Pranimi në IIT konsiderohet ndër arritjet më të mëdha akademike në Indi. Çdo vit rreth 1.3 milionë maturantë marrin pjesë në provimin kombëtar për t’u pranuar, ndërsa vetëm një pjesë shumë e vogël arrin të sigurojë një vend në këto universitete prestigjioze.
Megjithatë, ekspertët thonë se presioni akademik, konkurrenca e ashpër dhe ankthi për punësimin shpesh krijojnë një mjedis shumë stresues për studentët. Në vitin 2024, rreth 38 për qind e të diplomuarve nga IIT mbetën pa punë, një fakt që sipas analistëve rrallë diskutohet publikisht.
Në disa raste janë ngritur edhe akuza për diskriminim social dhe presion nga profesorët. Familja e Darshan Solanki, një student 20-vjeçar që vdiq në IIT-Bombay në vitin 2023, pretendon se djali i tyre përjetonte tallje për shkak të përkatësisë së tij në një kastë më të ulët në sistemin social indian.
Ekspertët paralajmërojnë se shumë studentë ndihen të izoluar dhe nën presion të madh për të përmbushur pritshmëritë akademike dhe familjare. Ata kërkojnë që universitetet të ndërmarrin masa më të forta për mbështetjen psikologjike dhe për identifikimin e studentëve në rrezik.
“Vetëvrasjet në IIT mund të parandalohen nëse institucionet ndërhyjnë më herët dhe tregojnë më shumë përgjegjësi,” thonë specialistët e shëndetit mendor, duke theksuar se problemi nuk është mungesa e burimeve, por vullneti për ta adresuar krizën.
(Burimi: Al Jazeera)
