Gjykata Administrative ka vendosur rikthimin në detyrë të Sekretarit të Përgjithshëm të Bashkisë Tiranë, Alban Dokushi, duke shpallur absolutisht të pavlefshëm urdhrin e shkarkimit të tij nga funksioni. Vendimi ka efekt të menjëhershëm dhe është i detyrueshëm për zbatim, duke e rikthyer Dokushin në postin që e mbajti deri në largimin e tij me urdhër administrative tё Anuela Ristanit.
Sipas vendimit gjyqësor, shkarkimi është kryer në kundërshtim flagrant me ligjin dhe përbën shkelje të rëndë të standardeve procedurale. Me këtë vendim, Gjykata Administrative jo vetëm që rikthen një funksionar publik në detyrë, por korrigjon një akt që është vlerësuar si i paligjshëm në thelb dhe në formë.
Alban Dokushi u largua nga posti i Sekretarit të Përgjithshëm pas komandimit tё Anuela Ristani si kryetare e Bashkisë Tiranë, në periudhën pas arrestimit të kryebashkiakut Erion Veliaj. Largimi i tij u interpretua gjerësisht si vendim administrativ me ngarkesë politike. Sot, Gjykata Administrative ka vendosur të ndreqë këtë veprim.
Dokushi është një emër i njohur në administratën e Bashkisë Tiranë dhe një prej figurave që i qëndroi pranë Erion Veliajt edhe në betejën e tij institucionale, përfshirë përballjen në Gjykatën Kushtetuese, ku e mbrojti me qetësi dhe dinjitet profesional. Rikthimi i tij në detyrë, me urdhër gjykate, mbyll një kapitull të shkarkimeve të kryera pa bazë të qëndrueshme ligjore.
Ende nuk dihet nëse Dokushi do të zgjedhë të vijojë menjëherë punën në Bashkinë Tiranë apo do të marrë kohë për të vendosur mbi rikthimin praktik në funksion. Por juridikisht, vendimi është i qartë: ai është Sekretar i Përgjithshëm i Bashkisë Tiranë, me fuqi të plotë ligjore.
Më shumë se një rikthim personal, ky vendim shihet si një test i rëndësishëm për funksionimin e drejtësisë administrative. Një rast ku një gjykatë vendos të rrëzojë një urdhër shkarkimi të paligjshëm dhe të rikthejë standardin që emërimet dhe shkarkimet në administratë nuk mund të bëhen me urdhra politikë që shkelin ligjin “me të dyja këmbët”.
Në një realitet ku administrata publike shpesh lëkundet nga vendime të shpejta politike, ky vendim për Alban Dokushin tregoi sot se, ligji ka fjalën e fundit.
